სახელმწიფო აუდიტის სამსახურის ხელმძღვანელსა და ყოფილ პროკურორს შორის მომხდარ დაპირისპირებასთან დაკავშირებით დღეს შსს-ს მიერ გაკეთებულ განცხადებას მთავარი აუდიტორი ლაშა თორდია დღეს გამართულ ბრიფინგზე გამოეხმაურა. ლაშა თორდიას თქმით საგამოძიებო ორგანოებს მხრიდან ყველაფერი კეთდება იმისთვის, რომ ოთარ ფარცხალაძეს ჩადენილი დანაშაულზე პასუხისმგებლობა ააცილონ. გენერალური აუდიტორი საგამოძიებო კომისიის შექმნას ითხოვს და მიმდინარე პროცესებთან დაკავშირებით დიპლომატიური კორპუსის და საერთაშორისო ორგანიზაციების ინფორმირებას გეგმავს. თორდია აღნიშნულ მოვლენებს აუდიტის სამსახურზე ზეწოლად აფასებს:

„მე სხვა გამოსავალი არ მაქვს, მოვითხოვ საგამოძიებო კომისიის შექმნას ასევე ვთხოვ ყველა საერთაშორისო ორგანიზაციას და დიპლომატიურ კორპუსს, რომ ჩაერიონ დროულად მიმდინარე პროცესებში, ვინაიდან მე ვხედავ უკვე ისეთ გარემოებებს, რომელიც მაიძულებს მე რომ მივმართო სხვა ღონისძიებებს, რადგან ვერანაირ სამართალს ვერ ვიპოვით. მე მქონდა ამერიკის საელჩოს წარმომადგენლებთან შეხვედრა და ისინი ინფორმირებულნი არიან. საინტერესოა ისიც, რომ შსს-ს ეს ბრიფინგი დაემთხვა სახელწიფო აუდიტის დღევანდელი ანგარიშის წარდგენას. არავის არ ეგონოს, რომ ჩვენ რამეს გადავდებთ. აუდიტის სამსახურის საქმიანობიდან გამომდინარე ხორციელდება ზეწოლა მთელი იმ უწყებების მხრიდან, რომლებიც ჩართულები არიან ამ პროცესში. ყველაფერი კეთდება იმისთვის რომ ჩვენ ჩვენი სიმართლე ვერ დავამტკიცოთ. მე არ ვაპირებ ერთი ნაბიჯითაც უკან დახევას და არ ვაპირებ ჩვენი ინსტიტუცია და საქმიანობა გადავაბარო ოთარ ფარცხალაძისნაირ ადამიანებს.“- განაცხადა თორდიამ.