"ჯანდაცვის სამინისტრო მკვლელია! ყველაზე დაუცველ ადამიანებს ყველაზე სასტიკად ექცევიან"- გოცირიძე

პოლიტიკა - 14:16, 22 May, 2017

2516

„ერთიანი ნაციონალური მოძრაობის“ წევრი რომან გოცირიძე, ფსიქიური ჯანმრთელობის სფეროსთან დაკავშირებით ჯანდაცვის სამინისტროს პოლიტიკას აკრიტიკებს და აცხადებს, რომ ათასობით პაციენტი მკურნალობის გარეშეა დარჩენილი. გოცირიძე ამ საკითხის მოუგვარებლობას უკავშირებს დანაშაულებსაც, რომელსაც ამ პრობლემების მქონე ადამიანები ჩადიან:

„ჯანდაცვის სამინისტრო მკვლელია!

თვე არ გავა, ფსიქიურად დაავადებულმა ადამიანმა რაიმე დანაშაული არ ჩაიდინოს ან საკუთარ თავს არ მიაყენოს ზიანი.

გუშინ ახალგაზრდა ქალმა კვლავ მოკლა მშობელი.

ოთხმილიონიან ქვეყანაში იმაზე მეტი უბედური შემთხვევა ხდება, ვიდრე მასზე მრავალრიცხოვან ქვეყნებში.

ათასობით პაციენტი არის დარჩენილი მკურნალობის გარეშე. ფსიქიატრიის სფეროს დაფინანსება კატასტროფულ მდგომარეობაშია. წელიწადში მხოლოდ 16 მილიონი ლარი იხარჯება ყველაფერზე, რაც კი ფსიქიატრიას ეხება-საავადმყოფოებით დაწყებული, პოლიკლინიკებით დამთავრებული. ეს ფული დასავლეთში ერთ ფსიქიატრიულ კლინიკასაც კი არ ეყოფოდა.

მაშინ, როცა ჯანდაცვის ბიუჯეტმა მილიარდ ლარს მიაღწია, წლებია ფსიქიატრიას დაფინანსება არ ეზრდება. პირიქით, ლარის გაუფასურებისა და მედიკამენტებზე ფასების ზრდის გამო, რეალურ გამოხატულებაში დაფინანსება მნიშვნელოვნად შეუმცირდათ.

ყველაზე დაუცველ ადამიანებს ყველაზე სასტიკად და უსინდისოდ ექცევიან.

გასარეკია მთელი სამინისტროს უფროსობა!“- წერს რომან გოცირიძე.