"ტყვია ერთ-ერთი პაციენტის საწოლს მოხვდა"- ინფექციური საავადმყოფოში მომხდარ სროლას თვითმხილველი იხსენებს

შემთხვევა - 12:07, 20 May, 2017

1850

თბილისში, ინფექციური საავადმყოფოს მიმართულებით განხორციელებული სროლის ფაქტზე შინაგან საქმეთა სამინისტრომ გამოძიება დაიწყო. მომხდარს ერთ-ერთი თვითმხილველი იხსენებს და აღნიშნავს, რომ ტყვიები ჯერ პალატის ფანჯარას მოხვდა და შემდეგ ერთი ტყვია ერთ-ერთი პაციენტის საწოლს.

"ღამის 11 საათი იქნებოდა, სროლის ხმა რომ გავიგეთ. ჯერ გარედან ისმოდა, მერე ფანჯრების გასკდომის ხმა იყო, რამდენიმე ტყვია მოხვდა ჩვენს ფანჯარას და მერე ერთი ტყვია უკვე ერთ-ერთის საწოლს. ბეწვზეა გადარჩენილი. სროლის ხმაზე მაშინვე ძირს დავწექით და რომ გაგრძელდა, მერე გარეთ გავხოხდი დაწოლილი, ყველაზე ახლოს მე ვიყავი კარებთან და 112-ში დავრეკე, რომ ველაპარაკებოდი, ამ დროსაც ისმოდა სროლის ხმა. ჩვენი პალატა კორპუსის ბოლოა და პირდაპირ უყურებს საცხოვრებელ კორპუსს და, როგორც ჩანს, იქიდან იყო სროლა," - ამბობს თვითმხილველი რუსთავი 2-თან საუბრისას და იხსენებს, რომ სრილამდე რამდენიმე წუთით ადრე პაციენტები ფეხზე იყვნენ და ფანჯარასთან მოძრაობდნენ და დიდი შანსია, სროლა რამდენიმე წუთით ადრე რომ მომხდარიყო მათ მოხვდებოდათ.

თვითმხილველის ვარაუდით, საავადმყოფოს მოპირდაპირე მხარეს მდებარე საცხოვრებელი კორპუსიდან მთვრალმა ადამიანმა ისროლა.

შეგახსენებთ, რომ შემთხვევა გუშინ მოხდა და მომხდართან დაკავშირებით გამოძიება სისხლის სამართლის კოდექსის 187-ე მუხლის პირველი ნაწილით მიმდინარეობს, რაც ნივთის დაზიანებას ან განადგურებას გულისხმობს.