ჰერბერტ ზალბერი ოკუპირებულ ცხინვალში ჩატარებულ არჩევნებს არ აღიარებს

პოლიტიკა - 17:25, 19 May, 2017

2065

გერმანელმა დიპლომატმა ჰერბერტ ზალბერმა საგარეო საქმეთა სამინისტროში დავით დონდუასთან შეხვედრის შემდეგ განაცხადა, რომ ევროკავშირი საქართველოს სუვერენიტეტს და ტერიტორიულ მთლიანობას მხარს უჭერს და ის, როგორც ევროკავშირის წარმომადგენელი, სრულად იზიარებს ამ რინციპს.

მისი თქმით, როგორც ევროკავშირის საგანგებო წარმომადგენელი არ სცნობს ოკუპირებულ ტერიტორიაზე, ცხინვალში, ჩატარებულ არჩევნებს.

„ევროკავშირი სრულად უჭერს მხარს საქართველოს ტერიტორიულ მთლიანობას. ეს ჩვენთვის ძალიან ცხადი და აშკარა პრინციპია და მე, როგორც ევროკავშირის წარმომადგენელი სამხრეთ კავკასიაში, მხარს ვუჭერ ამ პრინციპს. მე ამას ყოველი შესაძლებლობისას ხაზს ვუსვამ. რაც შეეხება არჩევნებს საქართველოს სეპარატისტულ რეგიონში, სამხრეთ ოსეთში, ევროკავშირმა ერთმნიშვნელოვნად განაცხადა, რომ არ აღიარებს იმ ფორმატს, რომლის ფარგლებში ეს არჩევნები ჩატარდა. მე ასევე მხარს ვუჭერ ამ პოზიციას. ამავდროულად, ევროკავშირი ერთგულია, ხელი შეუწყოს კონფლიქტის მშვიდობიან გადაჭრას. ზუსტად ამ მიზეზის გამო ევროკავშირი და პირადად მე ჩართულნი ვართ ჟენევის დისკუსიებში. ეს ჩემი მანდატის საფუძველია,“ - განაცხადა ჰერბერტ ზალბერმა.

თუმცა, დიპლომატმა დღეს არ გააკეთა განმარტება, რატომ მიულოცა ოკუპირებული ცხნივალის ე.წ. პრეზიდენტს არჩევნებში გამარჯვება.

შეგახსენებთ, რომ ჰერბერტ ზალბერმა, საოკუპაციო რეჟიმის ე.წ. პრეზიდენტს, ანატოლი ბიბილოვს, არჩევნების წარმატებით ჩატარება მიულოცა. შემდეგ კი ზალბერი გალში, ოკუპაციის ხაზზე 3 საკონტროლო-გამშვები პუნქტის დახურვის პროცესს დაესწრო.