ადამიანის უფლებათა და თავისუფლებათა დაცვის ევროპული სასამართლოს მოსამართლის ნონა წოწორიას ოჯახის წევრის სახლში ბათუმში, გუშინ ღამით სამართალდამცავებმა ჩხრეკა ჩაატარეს. წოწორიას ძმის სახლიდან, როგორც შემდგომში უწყებამ განაცხადა, ამოღებულია ცეცხლსასროლი იარაღი და ვაზნები.

აღნიშნულს „ეროვნულ დემოკრატიული პარტიის“ ლიდერი ბაჩუკი ქარდავა ეხმაურება. მისი განცხადებით, მომხდარი წოწორიას საქმიანობას უკავშირდება და შიშის დამკვიდრებას ემსახურება:

„არ ვიცი წოწორია რა შუაშია რუსთავი 2-ის საქმესთან მიმართებით, როდესაც სტრასბურგის კოლეგიამ მიიღო ეს გადაწყვეტილება. თუმცა, ეს ამ ხელისუფლების მართვის ფორმა და სტილია, რომ ,,არ შერჩებათ ჩემს წინააღმდეგ გალაშქრება". ეს ალბათ უფრო შიშის დამკვიდრების სურვილია, თუმცა, ბევრმა სცადა საქართველოში ხალხის დაშინება, მაგრამ საბოლოო ჯამში ხალხმა ამაზე პასუხი გასცა სულ სხვა ფორმით“, - აცხადებს ბაჩუკი ქარდავა.

ნონა წოწორია მომხდარს სოციალური ქსელში გამოეხმაურა. მოსამართლის თქმით, მას აქვს საფუძვლიანი ეჭვი იფიქროს, რომ მომხდარი მის საქმიანობას უკავშირდება. შეგახსენებთ, რომ ნონა წოწორია იმ მოსამართლეთა კოლეგიის წევრია, რომელმაც რუსთავი 2-ის საქმესთან დაკავშირებით საქართველოს უზენაესი სასამართლოს გადაწყვეტილების აღსრულების უვადო შეჩერება მიიღო. წოწორია ასევე საქართველოს ყოფილი პრემიერ-მინისტრის ვანო მერაბიშვილის საქმის განმხილველი მოსამართლეთა კოლეგიის წევრია.