მთავარ აუდიტორზე კრიმინალური თავდასხმა მოხდა - პრეზიდენტის ადმინისტრაციის პოზიცია უცვლელია და საქმის სასწრაფო გამოიებას ითხოვს

პოლიტიკა - 14:22, 19 May, 2017

1154

პრეზიდენტის ადმინისტრაციის უფროსი, გიორგი აბაშიშვილი გენერალურ აუდიტორზე განხორციელებულ თავდასხმას კიდევ ერთხელ გამოეხმაურა. აბაშიშვილი საქმის ობიექტურ გამოძიებას ითხოვს.
პრეზიდენტის ადმინისტრაციის უფროსი მიიჩნევს, რომ მთავარ აუდიტორზე კრიმინალური თავდასხმა მოხდა.
"ჩვენი მხრიდან პირველივე დღეს გაკეთდა განცხადება გენერალური აუდიტორზე განხორციელებული კრიმინალური თავდასხმის დაკავშირებით. მე მაშინ მოვინახულე ბატონი ლაშა, პოზიცია არის უცვლელი - საქმის სასწრაფო გამოძიება აუცილებელია, ისე რომ არ ჩანდეს და არ იყოს არცერთი კითხვის ნიშანი. გამომდინარე იქიდან, რომ ორმაგად დამამძიმებელი გარემოებაა, როდესაც უმაღლესი თანამდებობის პირზე, როგორც ამას ბატონი ლაშა აღნიშნავს შესაძლებელია თავდასხმა ხდებოდეს მისი პროფესიული საქმიანობიდან გამომდინარე. საჭიროა საქმის უსწრაფესი გამოძიება იმისთვის, რომ საქართველოს თითოულმა მოქალაქემ თავი დაცულად უფრო მეტად იგრძნოს "- განაცხადა აბაშიშვილმა.

ლაშა თორდიას განცხადებით, მას 13 მაისს, ყოფილი მთავარი პროკურორი ოთარ ფარცხალაძე დაესხა თავს და დაცვის წევრებთან ერთად ფიზიკურად გაუსწორდა. თორდია თავდასხმას აუდიტის სამსახურის საქმიანობას უკავშირებს ვინადიდან, საქმე 2016 წელს მიწების გადაცემის საკითხს ეხება და მასში ოთარ ფარცხალაძე ფიგურირებს. საქმეზე გამოძიება სისხლის სამართლის კოდექსის 126-ე მუხლით დაიწყო, რაც ძალადობას გულისხმობს.

ოთარ ფარცხალაძე ბრალდებას კატეგორიულად უარყოფს. მისი თქმით, ყველა სამართლებრივ გზას მიმართავს, რათა მისი დარღვეული უფლებები აღადგინოს.

ყოფილი პროკურორი ირწმუნება, რომ კონფლიქტის ინიციატორი ძლიერი ალკოჰოლური თრობის ქვეშ მყოფი ლაშა თორდია იყო.