ოთარ ფარცხალაძის ადვოკატები გენერალურ აუდიტორს ლაშა თორდიას მოწმეებზე ზეწოლაში ადანაშაულებენ. ამის მაგალითად მას გადაცემა „არჩევანში“ გასულ სამშაბათს თორდიას მიერ გაკეთებული განცხადება მოიყვანეს, სადაც გენერალურმა აუდიტორმა ეჭვქვეშ დააყენა იმ მოწმეების სანდოობა, რომლებიც ფარცხალაძის ადვოკატებმა გამოკითხეს.

ლაშა თორდია მიიჩნევს, რომ ფარცხალაძის ადვოკატებს სურთ საქმის იმ მიმართულებით წაყვანა, რომ გენერალური აუდიტორი, მუდმივად თავისმართლების პოზიციაში იყოს.

აღნიშნულ საქმეზე კიდევ ერთ განცხადებას აკეთებს სახალხო დამცველი, უჩა ნანუაშვილის თქმით, მომხდარი არის მმართველობის წინააღმდეგ მიმართული დანაშაული. გამოძიება კი მეტი ობიექტურობა მოეთხოვება აღნიშნულ საქმესთან მიმართებით:

„რატომ არ არის თორდია მაღალი თანამდებობის პირი, არის ერთ-ერთი ყველაზე მაღალი თანამდებობის პირი, საუბარია გენერალურ აუდიტორზე, რომელსაც ფართო უფლებამოსილებები გააჩნია საქართველოში. კარგი იქნება ადვოკატებმაც მოისმინონ გასაგებად, რომ აუცილებელია გონივრულ ვადაში ამ საქმის გამოძიება, თუ უახლოეს დღეებში არ მოხდება შესაბამისად გამოძიების დასრულება და ყველა იმ კითხვაზე პასუხის გაცემა, რასაც ადგილი ჰქონდა, რა თქმა უნდა ასეთ შემთხვევაში ჩვენ მიზანშეწონილად მივიჩნევთ, სხვა ფორმატში ამ საკითხის შესწავლის აუცილებლობის განხილვას“, - აცხადებს უჩა ნანუაშვილი.