"ეს იყო ჰერბერტ ზალბერის პირადი რეპლიკა და არ არის ევროკავშირის პოზიცია" - საქართველოს მუდმივი წარმომადგენელი ევროკავშირში

პოლიტიკა - 10:29, 19 May, 2017

619

საქართველოს მუდმივი წარმომადგენელი ევროკავშირში, ნატალია საბანაძე, გერმანელი დიპლომატის მიერ საქართველოს ოკუპირებულ რეგიონში გაკეთებულ განცხადებებს გამოეხმაურა.

მისი თქმით, "ეს იყო ჰერბერტ ზალბერის პირადი რეპლიკა და არ არის ევროკავშირის პოზიცია".

საბანაძე აცხადებს, რომ მომხდარის შესახებ ინფორმირებული არიან ევროკავშირში.

„ეს არ იყო განცხადება, ეს არის მისი პირადი რეპლიკა, ეს ეპიზოდი საკმაოდ არასასიამოვნოა. რა თქმა უნდა, ჩვენთვის ეს იყო შემაშფოთებელი. ყველა დიპლომატიური არხით მივიტანეთ ევროკავშირის ყურამდე ჩვენი შეშფოთება. მათი რეაგირება იყო ის, რომ კიდევ ერთხელ ხაზი გაესვათ იმისთვის, რომ ეს არ არის ევროკავშირის პოზიცია და ბატონი ზალბერის ეს სპონტანური რეპლიკა შესაბამისობაში არ მოდის იმ პოზიციასთან, რომელიც მათ აქვთ,“ - განაცხადა ნატალია საბანაძემ.

ჟენევის მოლაპარაკების თანათავმჯდომარეს ჰერბერტ ზალბერს, დღეს თბილისში ელოდებიან.

გერმანელმა დიპლომატმა და ევროკავშირის სპეციალურმა წარმომადგენელმა, ჰერბერტ ზალბერმა, საოკუპაციო რეჟიმის ე.წ. პრეზიდენტს, ანატოლი ბიბილოვს, არჩევნების წარმატებით ჩატარება მიულოცა. შემდეგ კი ზალბერი გალში, ოკუპაციის ხაზზე 3 საკონტროლო-გამშვები პუნქტის დახურვის პროცესს დაესწრო.