სტრასბურგის სასამართლოში წარსადგენი კანდიდატების შერჩევა - ოპოზიცია პროცესის გამჭვირვალოას ითხოვს

პოლიტიკა - 09:58, 19 May, 2017

917

ოპოზიცია ადამიანის უფლებათა ევროპულ სასამართლოში წარსადგენი კანდიდატების შერჩევის პროცესის გამჭვირვალობის აუცილებლობაზე ამახვილებს ყურადღებას.

ევროპული საქართველოს წევრი ზურაბ ჭიაბერაშვილი აღნიშნავს, რომ „პრობლემა წარმოიშვება დასკვნით ეტაპზე, როცა ხელისუფლება ტოვებს ისეთ სამ კანდიდატს სტრასბურგში გასაგზავნად, რომელთა კვალიფიკაციასთან, პროფესიონალიზმთან და პატიოსნებასთან დაკავშირებით ძალიან დიდი კითხვები არსებობს".

ნაციონალური მოძრაობის შეფასებით, ხელისუფლება პოლიტიკური გავლენით შერჩეულ კანდიდატებზე აკეთებს არჩევანს.

„სამწუხაროდ, წინა ჯერზე ეს პროცესი წარიმართა სხვადასხვა პოლიტიკური თუ ნეპოტისტური გავლენების ქვეშ და ამის შედეგად ჩვენ მივიღეთ ძალიან დიდი ზიანი,“ - განაცხადა სალომე სამადაშვილმა.

საპარლამენტო უმრავლესობაში კი ირწმუნებიან, რომ მოსამართლეთა შერჩევის პროცესი გამჭვირვალედ მიმდინარეობს.

დეპუტატი ოპოზიციის განცხადებებს მოსამართლეების დამცირების მცდელობას უწოდებს.

„ძალიან წესიერი ადამიანები, ძალიან სწორად მოაზროვნენი და პროფესიონალები, რაღაც გარკვეულ ეტაპზე ვერ გადიან გარკვეულ ფილტრს და ეს არანაირად ამ ადამიანებს არ ამცირებს. ასე რომ, დამცირების მცდელობა ოპოზიციის ტაქტიკური პოზიციაა,“ - ამბობს ქართული ოცნების დეპუტატი გია ვოლსკი.