თავდასხმა თორდიაზე - უმარავლესობა და ოპოზიცია საგამოძებო კომისიის შექმნაზე ვერ თანხმდება

პოლიტიკა - 09:37, 19 May, 2017

1068

მმართველი გუნდი ყოფილი მთავარი პროკურორისა და სახელმწიფო აუდიტის სამსახურის ხელმძღვანელის თავდასხმის საქმეზე პარლამენტში დროებითი საგამოძიებო კომისიის შექმნის აუცილებლობას ვერ ხედავს.

ქართულ ოცნებაში ამბობენ, რომ ისინი გამოძიების პროცესებს დააკვირდებიან და კომისიის შექმნაზე მხოლოდ საჭიროების შემთხვევაში იმსჯელებენ.

„პარლამენტს ამ საკითხთან დაკავშირებით უარი არ უთქვამს, აქ იყო საუბარი იმაზე, რომ ჩვენ უნდა დაველოდოთ გამოძიებას. ეს ნიშნავს იმას, რომ ჩვენ გვაქვს ნდობა იმ ორგანოების მიმართ, რომლებიც აწარმოებენ გამოძიებას. შესაბამისად, ჩვენ ვაკვირდებით ამ პროცესს,“ - განაცხადა ქართული ოცნების წევრმა ანრი ოხანაშვილმა.

საპარლამენტო უმცირესობაში კომისიის შექმნაზე მმართველი გუნდის უარს არსებული კორუფციული გარიგების დეტალების შიშს უკავშირებენ.

„უმრავლესობას არ ჰქონდა არცერთი არგუმენტი, თუ რატომ არ უნდა შეიქმნას საგამოძიებო კომისია, მაგრამ ისინი მაინც უარს ამბობენ კომისიის შექმნაზე. ეს არის ძალიან მნიშვნელოვანი საკითხი, ეს არის საკითხი, რომელიც ეხება სახელმწიფოს უმნიშვნელოვანეს ინსტიტუტებს და პარლამენტის პრესტიჟს,“ - აგანაცხადა სერგო რატიანმა.

ნაციონალური მოძრაობაში კი აღნიშნავენ, რომ ობიექტური და მიუკერძოებელი გამოძიება მართლმსაჯულების ამ კონტექსტში არ არსებობს.

„ფარცხალაძე წარმოადგენს არაფორმალურ მმართველს, მისი პირდაპირი მითითებები საგამოძიებო უწყებებზე ზუსტად მიგვანიშნებს იმას, რომ ობიექტური და მიუკერძოებელი გამოძიება მართლმსაჯულების ამ კონტექსტში არ არსებობს. უმრავლესობაც არის მიკერძოებული და არ სურს დადგინდეს ობიექტური ვითარება,“-ამბობს ხატია დეკანოიძე.