"10 წამში შემიძლია, ფარცხალაძეს და მის ადვოკატს ჩემზე უარესი დავმართო"- თორდია გამოძიებას არ ენდობა

პოლიტიკა - 18:09, 18 May, 2017

6499

სახელმწიფო აუდიტის სამსახურის უფროსი ლაშა თორდია მის საქმეზე მიმდინარე გამოძიებას არ ენდობა და აცხადებს, რომ გამოძიება შეგნებულად არასწორი მუხლით მიმდინარეოობს. თორდიას თქმით საქმეზე ძიება ისეთი მუხლითაა დაწყებული, რაც კამერის ჩანაწერების ამოღებას არ ითვალისწინებს, რაც ერთ-ერთ მტავარ მტკიცებულებას წარმოადგენს:

„გამოძიება, რომელიც დაწყებულია, დაწყებულია იმისთვის, რომ გამოძიება არ დასრულდეს და არ შედგეს. მუხლი რომლის კვალიფიკაციაც არის მსუბუქი და არ არის იმ ჩამონათვალში, რომელიც ითვალისწინებს კამერების ამოღებას. ანუ საგამოძიებო ორგანოსაც კი არ აქვს უფლება ამოიღოს კამერები. იქ რაც მოხდა იმის მთავარი მტკიცებულება გაქრება. ფარცხალაძის ადვოკატები აწარმოებენ გამოკითხვებს სადაც გაურკვეველი ადამიანები იძლევიან ჩვენებას, თუ როგორ ვიქცეოდი მე და გადავდივართ მსჯელობის სრულიად სხვა ასპექტში, სადაც საუბარია ვინ სვამდა ცქრიალა ღვინოს და ვინ როგორ იქცეოდა. საუბარი არის იმაზე, რომ ამ ადამიანებს გამოძიების ჩატარება არ უნდათ, არც იმის უფლება აქვთ რომ გამოკითხვები ამ ფორმით აწარმოონ, ეს საპროცესო წესებში არ ჯდება და არის მხოლოდ და მხოლოდ ჩემი დისკრედიტაციისკენ მიმართული.“- განაცხადა თორდიამ.

ლაშა თორდიას თქმით ოთარ ფარცხალაძის ადვოკატებს საქმის სხვაგვარად წარმართვა სურთ.

„დაიწყეს უაზრო საუბრები წამიერ შეხვედრაზე. დაახლოებით ერთი წუთი გრძელდებოდა ჩხუბი და 12 რაუნდი არ მიჩხუბია, 10 წამში შემიძლია მე, მარტომ ფარცხალაძეს და მის ადვოკატს დავმართო ჩემზე უარესი, რაც მათ დამმართეს. საუბრობენ იმაზე, რომ გავედი საპირფარეშოში, თავი ვურტყი კედელს და დაზიანებები თვითონ მივიღე, ეს არის აბსურდის თეატრი, ცირკი, რომელსაც ოთარ ფარცხალაძე თავისი ადვოკატების საშუალებით ალაგებს. მთავარი თემა არის ის, რომ სპეციალურად გამოძიება არის იმ მუხლით, რომ არ მოხდეს კამერების ჩანაწერების ამოღება, რადგან გავიდეს დრო და ამ კამერების ჩანაწერები წაიშალოს. ეს არის ჩემი ერთადერთი მტკიცებულება. მათი მოწმეები იქნებიან ის ადამიანები, რომლებზეც მოახდნენ ზეწოლას, რადგან ჩემი ინფორმაციით, ფარცხალაძის მაგიდაზე, გარდა მიშა ჩოხელისა, იყო კიდევ ფინანსური პოლიციის ხელმძღვანელობა, მოადგილე, საგამოძიებოს უფროსი და ყველა ის ადამიანი, ვისაც ხელეწიფება ზეწოლის მოხდენა. ეს ადამიანები თავს გადაირჩენენ ყველანაირი ფორმით“- განაცხადა თორდიამ.