თავხედური განცხადებები - ენმ ჰერბერტ ზალბერის ჟენევის მოლაპარაკებებიდან მოხსნას ითხოვს

პოლიტიკა - 17:32, 18 May, 2017

1386

ნაციონალური მოძრაობა ევროკავშირის სპეციალური წარმომადგენელის, ჰერბერტ ზალბერის, ჟენევის მოლაპარაკებებიდან მოხსნას ითხოვს.

სალომე სამადაშვილი აცხადებს, რომ პარტიაში ამბობენ, რომ ზალბერის განცხადებები თავხედურია და ის არ გამოხატავს ევროკავშირის პოზიციას.

„აღნიშნულ დიპლომატს, როგორც ჩანს, მიაჩნია, რომ მას შეუძლია, თავხედურად გააკეთოს განცხადებები, რომელიც სრულიად არ შეესაბამება ევროკავშირის ოფიციალურ პოლიტიკას. ამიტომ მას არ შეიძლება, რომ ჰქონდეს უფლებამოსილება, რომ ისაუბროს ევროკავშირის სახელით, მათ შორის ჟენევის მოლაპარაკებებზე და ერთადერთი ადეკვატური რეაქცია საქართველოს ხელისუფლების მხრიდან არის მოთხოვნა მისი მანდატის დაუყოვნებლივ შეწყვეტის და ჩანაცვლების მისი სხვადიპლომატით,“ - განაცხადა სალომე სამადაშვილმა.

ჟენევის დისკუსიის თანათავმჯდომარეებმა გუშინ აფხაზეთის საოკუპაციო ხაზთან მდებარე სამი საკონტროლო - გამშვები პუნქტი მოინახულეს, რომელიც აფხაზეთის საოკუპაციო რეჟიმმა მარტის თვეში დახურა. ჟენევის დისკუსიის თანათავმჯდომარეებს მათ ადგილზე გალის ე.წ. ადმინისტრაციის ხელმძღვანელი, თემურ ნადარაია და ოკუპირებული აფხაზეთის ე.წ. საგარეო საქმეთა მინისტრი, დაურ კოვე, შეხვდნენ. ინფორმაციას ამის შესახებ რუსული მედია ავრცელებს.

ისიც აღსანიშნავია, რომ გერმანელი დიპლომატი, ევროკავშირის საგანგებო წარმომადგენელი, ჰერბერტ ზალბერი, გუშინ დიპლომატიურ სკანდალში გაეხვა, როდესაც საოკუპაციო რეჟიმის ე.წ. პრეზიდენტს, ანატოლი ბიბილოვს, არჩევნების წარმატებით ჩატარება მიულოცა.