საკონსტიტუციო ცვლილებების განხილვის მეორე ეტაპი - შეხვედრა ზესტაფონში მიმდინარეობს

პოლიტიკა - 14:41, 18 May, 2017

1145

საკონსტიტუციო ცვლილებების განხილვა დღეს ზესტაფონში მიმდინარეობს. განხილვის მთავარი საკითხი სხვა ქალაქების მსგავსად აქაც პრეზიდენტის არჩევის წესი, საარჩევნო სისტემაა და მიწის გაყიდვის თემაა.

ოპოზიცია დამატებითი შეხვედრების მიზანს ვერ ხედავს. "ევროპული საქართველოს" წევრის გიგი წერეთლის განცხადებით, ისეთ ძირითად ცვლილებებზე, როგორიცაა პრეზიდენტის არჩევის წესი და გადაუნაწილებელი მანდატების საკითხი, პლებისციტის ჩატარება უალტერნატივოა. საპარლამენტო უმრავლესობაში კი დარწმუნებულები არიან, რომ შეხვედრები უნდა გაგრძელდეს. გია ვოლსკის თქმით, მოსახლეობაში ინფორმაციის მიწოდების ნაკლებობაა.

ქართული ოცნების წევრის, მამუკა მდინარაძის, განცხადებით, მაჟორიტარული სისტემის ცვლილებასთან დაკავშირებით განსხვავებული მოსაზრებები არსებობს. მდინარაძის თქმით , საკითხზე დისკუსია ამ დრომდე მიმდინარეობს, თუმცა დეპუტატის განცხადებით , ის დარწმუნებულია, რომ საბოლოო ჯამში კანონმდებლები პროპორციულ საარჩევნო სისტემაზე შეთანხმდებიან.

„ქვეყნის სტაბილურ განვითარებას და ხალხთან კონტაქტს უფრო უზრუნველყოფს მაჟორიტარული სისტემის შენარჩუნება. კი, ბატონო, ეს არის სადისკუსიო საკითხი, ჩვენ ამაზე ვაგრძელებთ დისკუსიას, მაგრამ საბოლოო გადაწყვეტილებას ვფიქრობთ, რომ კონსესუსის სახით მივიღებთ პროპორციული სისტემის სასარგებლოდ,“ - განაცხადა მამუკა მდინარაძემ.

საკონსტიტუციო ცვლილებებზე დამატებითი განხილვების ჩატარების შესახებ განცხადება საქართველოს პარლამენტის თავმჯდომარემ ირაკლი კობახიძემ 16 მაისს გააკეთა. მისი თქმით, საჯარო განხილვა თბილისის 10 რაიონში და საქართველოს 10 მუნიციპალიტეტში დამატებით გაიმართება. შეხვედრები ჩატარდება ზესტაფონში, სამტრედიაში, სიღნაღში, ხულოში, მარნეულში, ახლაქალაქში, ოზურგეთში, ფოთში, ყაზბეგსა და მესტიაში. კონსტიტუციის პროექტის განხილვა 29 მაისს თბილისში დასრულდება, რის შემდეგაც საკონსტიტუციო ცვლილებათა პროექტზე მსჯელობა პარლამენტში გაგრძელდება.