”თამბაქოს კონტროლის შესახებ” კანონში შესატანი ცვლილებები 85 ხმით ერთის წინააღმდეგ პარლამენტმა დაამტკიცა. საკანონმდებლო ორგანოში საკანონმდებლო პაკეტი დეპუტატებმა დღეს მესამე მოსმენით განიხილეს და კენჭი უყარეს.

2018 წლის 1-ელი იანვრიდან თამბაქოს ნაწარმის სადა შეფუთვა და კოლოფზე თამბაქოს მოხმარების შედეგად გამოწვეული დაავადებების ფოტოების - პიქტოგრამების დატანა სავალდებულო ხდება.

2018 წლის პირველი მაისიდან ყველა დახურულ სივრცეში თამბაქოს, მათ შორის ელექტრო სიგარეტისა და ჩილიმის მოწევა აიკრძალება. აკრძალვა არ შეეხება საცხოვრებელ ბინებს, ფსიქიატრიულ კლინიკებს, სასჯელაღსრულებისა და წინასწარი დაკავების დაწესებულებებსა და კაზინოებს.

სიგარ-ბარებში მხოლოდ სიგარის მოწევა იქნება შესაძლებელი, თუმცა სავალდებულო ხდება სიგარ-ბარის გახსნის ნებართვის დოკუმენტის აღება, რომლის მოსაკრებელიც 15 ათასი ლარით განისაზღვერბა. აღნიშნულის შესახებ საკანონმდებლო ცვლილებები უმაღლეს საკანონმდებლო ორგანოში უკვე ინიცირებულია.

2018 წლის მაისიდან ასევე აიკრძალება თამბაქოს ნაწარმის რეკლამა. ასევე იმ ფილმების ჩვენების წინ, სადაც თამბაქოს მოხმარების კადრებია, სავალდებულო გახდება ანტითამბაქოს რეკლამის ჩვენება.

2018 წლის პირველი სექტემბრიდან დაუშვებელი იქნება თამბაქოს პროდუქციის გამოფენა სავაჭრო ობიექტების გარე ვიტრაჟებში. ასევე იკრძალება ე.წ. დრაივ-თამბაქო.

2021 წლიდან აკრძალვა შეეხება თამბაქოს ნაწარმის შიდა ხილვადობასაც და თამბაქოს ნაწარმი არა გამჭვირვალე ბოქსებში, არამედ შენიღბულ სივრცეში განთავსდება.