"ოჯახის სიწმინდეს მსვლელობები და მარშები არ ჭირდება. ოჯახის დახმარებაა საჭირო"- დეკანოზი თამაზ ლომიძე

სოც.მედია - 19:18, 17 May, 2017

1768

დეკანოზი თამაზ ლომიძე 17 მაისს ოჯახის სიწმინდის დაცვის დღისადმი მიძღვნილ აქციას სოციალურ ქსელში ეხმაურება. მისი თქმით სანამ ოჯახის სიწმინდეზე დაიწყება საუბარი მანამდე ოჯახის გადარჩენა და ელემენტარული არსებობაა საჭირო. დეკანოზი ტყიბულელი მეშახტის ვიდეოსაც აქვეყნებს, რომელშიც ის მეშახტეების აუტანელ ყოფაზე ყვება:

„რუსთაველზე კი ნუ გაიჭრებით, ამ კაცს ჰკითხეთ, რა არის მისთვის ოჯახის სიწმინდე და სიმტკიცე. სანამ სიწმინდემდე მივალთ, ჯერ ოჯახის გადარჩენაა საჭირო, რომ ოჯახმა ელემენტარული არსებობა, მეუღლემ მეუღლესთან და მშობელმა შვილთან ყოფნა და მისი აღზრდა შეძლოს. მსვლელობები და მარშები არ ჭირდება ოჯახის სიწმინდეს, ამათთვის შრომა და დახმარებაა საჭირო. ოჯახის დღე თუ აღინიშნება, უნდა აღინიშნებოდეს მხოლოდ და მხოლოდ გრანდიოზული საქველმოქმედო აქციებით ოჯახების დასახმარებლად ყველა სოფელში თუ დაბაში, ქალაქსა თუ რაიონში და ამის ორგანიზებას სახელმწიფოსთან ერთად პირველ რიგში ეკლესია უნდა აკეთებდეს. კარგი, ჩავიარეთ დღეს რუსთაველზე ხატებით, დროშებით და პარაკლისებით. შემდეგ? ხვალ რა ეშველება ამ გატანჯული კაცის ოჯახს? ემახსოვრება ის და მისი ოჯახი ვინმეს? ბოლომდე მოუსმინეთ, რას ამბობს ოჯახზე.

ევროპაში ოჯახის დღეები ჰქვია დღეებს, როცა გრანდიოზული ფასდაკლებები და შეღავათები ცხადდება სხვადასხვა პროდუქტებზე თუ სხვა მომსახურებაზე ოჯახებისთვის.“- წერს დეკანოზი თამაზ ლომიძე.