,,საგარეო უწყება უკვე ახორციელებს გარკვეულ ღონისძიებებს და შესაბამისი რეაგირება აუცილებლად მოჰყვება“

,,საგარეო უწყება უკვე ახორციელებს გარკვეულ ღონისძიებებს და შესაბამისი რეაგირება აუცილებლად მოჰყვება“ - ხულორდავა ზალბერის განცხადებაზე

პოლიტიკა - 15:38, 17 May, 2017

1538

საქართველოს პარლამენტის ევროპასთან ინტეგრაციის კომიტეტის თავმჯდომარე თამარ ხულორდავა, აცხადებს, რომ ევროკავშირის სპეციალურ წარმომადგენელს ჰერბერტ ზალბერის განცხადება ევროკავშირის არ გამოხატავს.

როგორც „ნიუპოსტს“ უმრავლესობის დეპუტატმა თემის შეფასებისას განუცხადა, ევროკავშირი საქართველოს ტერიტორიული მთლიანობის და სუვერენიტეტის მყარი მხარდამჭერია და ამ საკითხთან დაკავშირებით არავითარი კითხვის ნიშნები არ არსებობს.

"ამ საკითხზე არაერთი კომენტარი გაკეთდა, საქართველოს საგარეო საქმეთა სამინისტროს განცხადებაც ვნახეთ, საერთაშორისო საზოგადოების, მათ შორის ევროკავშირის პოზიცია რა არის ამ კუთხით ესეც კარგად არის ცნობილი და არაერთხელ, არაერთ დოკუმენტში არის დაფიქსირებული. ევროკავშირი ჩვენი ტერიტორიული მთლიანობის და სუვერენიტეტის მყარი მხარდამჭერია, ამ საკითხთან დაკავშირებით არავითარი კითხვის ნიშნები არ არსებობს.

თქვენ გახსოვთ, ევროკავშირის პოზიცია ოკუპირებულ ტერიტორიებზე რეფერენდუმისა და არჩევნების ჩატარების თაობაზე. მათ არაერთხელ დაგმეს ეს ფაქტი. რაც შეეხება ამ კონკრეტულ ფაქტს, ჩვენთვის ცნობილია ევროკავშირის ოფიციალური პოზიცია ამასთან დაკავშირებით, მე რამდენადაც ვიცი, საქართველოს საგარეო საქმეთა სამინისტრო უკვე ახორციელებს გარკვეულ ღონისძიებებს, დაინტერესებულია ამ ფაქტის გამოკვლევით და შესაბამისი რეაგირება აუცილებლად მოჰყვება, რადგან ეს პოზიცია, თუ ეს მართლა ასე იყო, არანაირად არ შეესაბამება იმ ოფიციალურ პოზიციას, რომელიც აქვს არამხოლოდ საქართველოს ხელისუფლებას, არამედ მთელს საერთაშორისო საზოგადოებას მათ შორის ევროკავშირს"- განაცხადა თამარ ხულორდავამ "ნიუპოსტთან" საუბრისას.

ცნობისთვის, ევროკავშირის სპეციალურმა წარმომადგენელმა ანატოლი ბიბილოვს არჩევნების წარმატებით ჩატარება მიულოცა. ფაქტმა დიპლომატიური გაურკვევლობა გამოიწვია. აღნიშნულის გამო საგარეო საქმეთა სამინისტროში ევროკავშირის ელჩი საქართველოში იანოშ ჰერმანი დაიბარეს. ჰერმანმა შეხვედრის დაწყებამდე ჟურნალისტებთან მცირე კომენტარი გააკეთა და განაცხადა, რომ იგი დარწმუნებულია, რომ ზალბერი იზიარებს ევროკავშირის პოზიციას და არ აღიარებს ე.წ. არჩევნებს ოკუპირებულ ტერიტორიაზე.