შერიგებისა და სამოქალაქო თანასწორობის საკითხებში სახელმწიფო მინისტრმა ქეთევან ციხელაშვილმა ევროკავშირის სპეციალური წარმომადგენლის სამხრეთ კავკასიასა და საქართველოს კრიზისების საკითხებში ჰერბერტ ზალბერის მიერ გუშინ, ოკუპირებული სამხრეთ ოსეთის ე.წ. პრეზიდენტ ანატოლი ბიბილოვთან შეხვედრისას გაკეთებულ განცხადებაზე კომენტარი გააკეთა და თქვა რომ „არანაირი საფუძველი არ არსებობს უშუალოდ ევროკავშირის პოზიციასთან დაკავშირებით რაიმე კითხვის ნიშნები გაჩნდეს“.

მისი თქმით, ევროკავშირის პოზიცია არის ძალიან მკაფიო და ცალსახა. ციხელაშვილი აცხადებს, რომ ჰერბერტ ზალბერის განცხადების ირგვლივ ძალიან მჭიდრო კომუნიკაციაა ევროკავშირთან და ბრიუსელთან.

”ცხადია, ეს კომუნიკაცია გაგრძელდება. მე ვფიქრობ, რომ ძალიან კარგი განმარტება გაკეთდა დღეს საქართველოში ევროკავშირის ელჩის მხრიდან... ევროკავშირი მხარს უჭერს საქართველოს ტერიტორიულ მთლიანობას და სუვერენიტეტს. ევროკავშირმა ასევე ძალიან მკაფიოდ დააფიქსირა პოზიცია ე.წ. არჩევნებთან და მის არალეგიტიმურობასთან დაკავშირებით. განცხადებები, რომელიც გავრცელდა მედიით, რა თქმა უნდა, ამ პოზიციასთან შესაბამისობაში არ მოდის, თუმცა, გარწმუნებთ, რომ არანაირი საფუძველი არ არსებობს უშუალოდ ევროკავშირის პოზიციასთან დაკავშირებით რაიმე კითხვის ნიშნები გაჩნდეს. ამის თაობაზე დღეს ევროკავშირის ელჩმა საქართველოში ასევე გააკეთა ძალიან ცალსახა განცხადება”- განაცხადა ციხელაშვილმა.

ცნობისთვის, ევროკავშირის სპეციალურმა წარმომადგენელმა ანატოლი ბიბილოვს არჩევნების წარმატებით ჩატარება მიულოცა .