რუსეთის ფედერაციის საგარეო საქმეთა სამინისტროს განცხადებას, საქართველოში ყოფილი მერის იური ლუჟკოვის ვიზიტთან დაკავშრებით, შერიგებისა საკითხებში სახელმწიფო მინისტრი ქეთევან ციხელაშვილი ეხმაურება.

ციხელაშვილის თქმით, მოსკოვის ყოფილ მერს საქართველომ სანქციები მის მიერ გაკეთებული განცხადების გამო დაუწესა და არა კანონდარღვევისთვის, რადგან ლუჟკოვის კანონდარღვევას საზღვრის კვეთასთან მიმართებით, ხანდაზმულობის ვადა გასული ჰქონდა.

„შინაგან საქმეთა სამინისტროს მიერ არ განხორციელებულა რაიმე სანქცია, რადგან იყო კანონდარღვევის ხანდაზმულობის ვადა, შესაბამისად ბატონ ლუჟკოვს მისი ტურისტული ვიზიტისას პრობლემები არ შექმნია, მაგრამ განცხადებები, რომელიც მან გააკეთა საქართველოს სახელმწიფოსთან მიმართებაში, აფხაზეთისა და ცხინვალის რეგიონებთან მიმართებაში, ცხადია, არც ხელისუფლებისთვის და არც ქართული საზოგადოებისთვის მისაღები არ იყო, ვერ იქნებოდა და ამასთან დაკავშირებით ძალიან მკაფიო განცხადებები და შეფასებები მისი ვიზიტის პერიოდშიც გაკეთდა,“ - განაცხადა ქეთევან ციხელაშვილმა.

რუსეთის საგარეო საქმეთა სამინისტრო საკუთარ მოქალაქეებს მოუწოდებს, ზედმიწევნით შეაფასონ რისკები, რაც საქართველოში გამგზავრებასთან არის დაკავშირებული.
ამის შესახებ საგარეო უწყების მიერ გავრცელებულ განცხადებაშია საუბარი: „ყურადღება მივაქციეთ საქართველოს ხელისუფლების განცხადებას, მოსკოვის ყოფილი მერის, იური ლუჟკოვის „არასასურველი პირების“ სიაში შეყვანის შესახებ , მანამდე მისი აფხაზეთსა და სამხრეთ ოსეთში ვიზიტების გამო“, - ნათქვამია განცხადებაში.