სახელმწიფო აუდიტის ხელმძღვანელი ოთარ ფარცხალაძესთან კონფლიქტის დაწყების დეტალებს იხსენებს. ამის შესახებ ლაშა თორდია გადაცემა „არჩევანის“ პირდაპირ ეთერში საუბრობს:

„იდეაფიქსად არ მქონდა, რომ სკანდალი მომეწყო. წამოვედი, მივედი აფთიაქში, ვიყიდე სამკურნალო საშუალებები, შემდეგ დავწექი და 10 წუტში დამეწყო თავის ძლიერი ტკივილი, ჩემმა მეუღლემ გადაწყვიტა რომ დაერეკა სასწრაფოში. მე უნდა ვიმართლო ახლა თავი, რატომ არ დავრეკე სასწრაფოში და პოლიციაში? ამათი მიზანი არის ზუსტად ეს, რომ ამაზე ვიდაოთ“, - აღნიშნავს თორდია.

მისი თქმით, უცნაურია ის ფაქტი, რომ ბრალდებების ფონზე არ საჯაროვდება კადრები, რომელიც მომხდარს ასახავს.

„ჩემი შველა, ამ საქმის გამოსავალი არის მხოლოდ და მხოლოდ ამ ვიდეოკადრებში იმიტომ, რომ ეს ადამიანები ყველაფერს იკადრებენ, მილიონ ჩვენებას გაახმოვანებენ, რომ მე დავესხი თავს, ძალიან მძიმე ალკოჰოლურ სასმელს ვსვამდი და ბატონი ოთარი ცქრიალა ღვინოთი პირს ისველებდა მხოლოდ და, ალბათ, არც ყლაპავდა და შემდგომ მე დავესხი თავს და უნებლიეთ გამიყვანა დაცვამ გვერდზე. ამის შემდგომ ვიჯექი კიდევ ჩემს მაგიდასთან და ვაგრძელებდი ქეიფს,“ - განაცხადა ლაშა თორდიამ.

ლაშა თორდიამ ინციდენტის დეტალები არჩევანში კიდევ ერთხელ გაიხსენა. მისივე თქმით, კადრები უკვე აღარ არსებობს და ის საგამოძიებო უწყებებმა „გააქრეს“.