გარემოსა და ბუნებრივი რესურსების დაცვის მინისტრის მოადგილე ეკატერინე გრიგალავა სამუშაო ვიზიტით ქ. ბრიუსელში იმყოფება, სადაც ევროკავშირის ახალი რეგიონული პროგრამის „წყლის ინიციატივა პლუსი“ (EUWI+) აღმასრულებელი კომიტეტის პირველი შეხვედრა გაიმართა.

შეხვედრის მიზანია აღმოსავლეთ პარტნიორობის თითოეული ქვეყნისთვის პროექტის ეროვნული სამოქმედო გეგმის განხილვა და დამტკიცება. ეკატერინე გრიგალავამ ევროკავშირს წყლის რესურსების მართვის კუთხით საქართველოში განხორციელებული და დაგეგმილი ქმედებები და ქვეყნის საჭიროებები გააცნო.

ახალი რეგიონული პროგრამა 2020 წლამდე გაგრძელდება და ხელს შეუწყობს საქართველოში წყლის რესურსების მართვის გაუმჯობესებას: დაიხვეწება შესაბამისი საკანონმდებლო ბაზა ასოცირების შეთანხმებისა და სხვა საერთაშორისო ვალდებულებების შესაბამისად, გაძლიერდება წყლის სექტორში ქვეყნის ინსტიტუციური შესაძლებლობები, გადაიარაღდება წყლის მონიტორინგის არსებული ლაბორატორიები, შეიქმნება წყლის საინფორმაციო ბაზა და ჩამოყალიბდება აზერბაიჯანთან და სომხეთთან ტრანსსასაზღვრო მდინარეების მართვის ერთიანი სისტემა. პროგრამას ევროკავშირთან ერთად ახორციელებენ ევროპის ეკონომიკური კომისია (UNECE), ეკონომიკური თანამშრომლობისა და განვითარების ორგანიზაცია (OECD) და ავსტრია-საფრანგეთის კონსორციუმი.