საქართველოს პარლამენტის თავმჯდომარის, ირაკლი კობახიძის განცხადებებს პრეზიდენტთან, როგორც ქვეყნის უმაღლეს მთავარსარდალთან მიმართებით, უშიშროების საბჭოს მდივანი „ნიუპოსტთან“ საუბრისას ეხმაურება.

დავით რაქვიაშვილის განცხადებით, პარლამენტის თავმჯდომარის მხრიდან აპელირება იმაზე, რომ სამხედრო ძალა უმაღლეს მთავარსარდალს არ დაემორჩილება, შემაშფოთებელი და გაურკვეველია:

„საკმაოდ შემაშფოთებელია ის, რომ ტენდენციური გახდა, რომ საქართველოს პარლამენტის თავმჯდომარე ამ განცხადებას უკვე არაერთგზის იმეორებს და ამბობს იმას, რომ საქართველოს სამხედრო ძალები არ დაემორჩილებიან საქართველოს უმაღლეს მთავარსარდალს, პრეზიდენტს ის თუ დღეს გასცემს განკარგულებას.

მე მესმის, რომ პარლამენტის თავმჯდომარისთვის ეს პროექტი არის მისი პირმშო, ის ამ საკანონმდებლო ინიციატივის მთავარი ავტორია, ის ალბათ განიცდის, რომ საზოგადოების მხრიდან საკმაოდ არაერთგვაროვანი დამოკიდებულებაა ამ პროექტთან მიმართებით. თუმცა, ეს არ შეიძლება გახდეს მიზეზი იმისა, რომ ეჭვქვეშ დავაყენოთ საქართველოს სამხედრო ძალების ერთგულება კონსტიტუციის მიმართ, ერთგულება მათ მიერ დადებული ფიცისადმი.

საკმაოდ შემაშფოთებელია თავად კონსტიტუციის მიმართ საქართველოს პარლამენტის თავმჯდომარის დამოკიდებულება. რადგან დღევანდელ, მოქმედ კონსტიტუციაში, საკმაოდ ნათლად არის გაწერილი პროცედურები და ერთადერთი, ვისაც შეუძლია დღეს სამხედრო ძალებთან დაკავშირებით გადაწყვეტილება მიიღოს, ეს არის საქართველოს პრეზიდენტი, უმაღლესი მთავარსარდალი. ის წარუდგენს ამ გადაწყვეტილებას პარლამენტს 48 საათის განმავლობაში, მაგრამ მისი ბრძანება გამოცემისთანავე ძალაშია. სამართლებრივი თვალსაზრისითაც საკმაოდ გაურკვეველია თუ რაზე აპელირებს ბატონი პარლამენტის თავმჯდომარე.

ასევე გასათვალისწინებელია ის, თუ ვის ვეუბნებით, რომ საქართველოს უმაღლეს მთავარსარდალს, პრეზიდენტს არ ემორჩილება სამხედრო ძალა?! საკმაოდ შემაშფოთებელია ასეთი ტექსტები“, - აღნიშნა დავით რაქვიაშვილმა „ნიუპოსტთან“ საუბრისას.

შეგახსენებთ, რომ საქართველოს პარლამენტის თავმჯდომარემ კონსტიტუციის საერთო-სახალხო განხილვის პროცესში რამდენიმეჯერ განაცხადა იმის შესახებ, რომ საქართველოს პრეზიდენტს, უმაღლეს მთავარსარდალს სამხედრო ძალები არ ექვემდებარებიან:

„ქვეყანას უნდა ჰყავდეს უმაღლესი მთავარსარდალი. უმაღლესი მთავარსარდალი დღესაც ჰყავს ქვეყანას და ხვალაც ეყოლება. ეს იქნება საქართველოს პრეზიდენტი, თუმცა არავინ მოგატყუოთ - არც დღეს არ ექვემდებარება პრეზიდენტს სამხედრო ძალები და არც ხვალ არ დაექვემდებარება. ამაშია პატარა ტყუილი, რომელსაც გაპარებენ. უმაღლესი მთავარსარდალი არ ნიშნავს იმას, რომ მას სამხედო ძალები ექვემდებარება“ - განაცხადა კობახიძემ.