ვენეციის კომისიის მხრიდან კრიტიკული კითხვები იყო ე.წ. ბონუსის სისტემასთან დაკავშირებით

ვენეციის კომისიის მხრიდან კრიტიკული კითხვები იყო ე.წ. ბონუსის სისტემასთან დაკავშირებით - ანა დოლიძე

პოლიტიკა - 20:11, 12 May, 2017

2764

საქართველოს პრეზიდენტის საპარლამეტი მდივანი ანა დოლიძე და ეროვნული უშიშროების საბჭოს მდივნის მოადგილე ლევან ბოძაშვილი ვენეციის კომისიის პრეზიდენტ ჯანი ბუკიკიოს და აღმასრულებელ მდივანს ტომას მარკერტს შეხვდნენ. შეხვედრამ პროდუქტიულად ჩაიარა და მხარეებმა საქართველოს კონსტიტუციის ახალი პროექტი განიხილეს.

განსახილვლელ საკითხებს შორის იყო, ყველა ის სადაო საკითხი, რომელზეც ყურადღება საყოველთაო სახალხო განხილვის დროს გამახვილდა.

„შეხვედრამ საქმიან გარემოში ჩაიარა და ძალიან პროდუქტიული იყო. როგორც ჩანს უახლოეს მომავალში ბერლინში გაიმართება კონფერენცია, სადაც უფრო დეტალურად მოხდება საქართველოს კონსტიტუციის ახალი პროექტის განხილვა. შეხვედრისას ყურადღება რამდენიმე საკითხზე გამახვილდა. საპარლამენტო მოდელზე გადასვლასთან დაკავშირებით კრიტიკული მოსაზრებები არ გამოთქმულა, თუმცა ხაზგასმით აღნიშნა, რომ მმართველობის ასეთ მოდელზე გადასვლის შემთხვევაში, აუცილებელია საპარლამენტო არჩევნების კანონმდებლობის დახვეწა. გარდა ამისა, საუბარი იყო, თუ რამდენად კარგი არის ბლოკების აკრძალვა და რამდენად წაადგება ეს ჩვენს განვითარებას. გარკვეული კრიტიკული კითხვები და მოსაზრებები იყო გამოთქმული ე.წ. ბონუსის შემოთავაზებულ სისტემასთან დაკავშირებით. საუბარი იყო, რამდენად საჭიროა ეს სისტემა, რამდენად მნიშვნელოვანია ეს, ასევე, რამდენად მნიშვნელოვანია კოალიციურად მართვის გამოცდილება ჩვენნაირი ქვეყნისთვის და რამდენად ხელს შეუშლის ამას ე.წ. ბონუსის სისტემა.“, - აღნიშნა საქართველოს პრეზიდენტის საპარლამენტი მდივანმა ანა დოლიძემ.