"საქართველო-ესტონეთს შორის ეკონომიკური თანამშრომლობის უზარმაზარი პოტენციალი არსებობს"- ესტონეთის პრემიერი

პოლიტიკა - 16:28, 12 May, 2017

1330

ესტონეთის პრემიერ-მინისტრი იური რატასის თქმით ესტონეთსა და საქართველოს შორის არსებობს შესანიშნავი ორმხრივი ურთიერთობები. ივნისში კი ორი ქვეყნის დიპლომატიური ურთიერთობების 25-ე წლისთავი აღინიშნება. რატასის თქმით ესტონეთი საქათველოს ტერიტორიული მთლიანობის და სუვერენიტეტის უპირობო მხარდამჭერია:

„ჩვენ უპირობო მხარდაჭერას ვუცხადებთ საქართველოს ტერიტორიულ მთლიანობას და სუვერენიტეტს. დაუშვებელია იმის უგულებელყოფა, რომ საქართველოს ტერიტორიების მნიშვნელოვანი ნაწილი დღესაც ოკუპირებულია რუსეთის მიერ.“- აღნიშნა რატასმა.

ესტონეთის პრემიერ-მინისტრმა საქართველოს ევროკავშირთან უვიზო რეჟიმის შემოღება მიულოცა და განაცხადა, რომ ეს საქართველოს მთავრობის და ქართველი ხალხის დიდი წარმატებაა. ამასთანავე რატასი საქართველოს მხარდაჭერას მომავალსიც დაპირდა:

„ვულოცავ საქართველოს ევროკავშირთან უვიზო რეჟიმის შემოღებას. ეს არის მნიშვნელოვანი ნაბიჯი ევროინტეგრაციის გზაზე და საქართველოს მთავრობის და ქართველი ხალხის დიდი წარმატება. აღმოსავლეთ პარტნიორობა წარმოადგენს ესტონეთის გრძელვადიან პრიორიტეტს და ჩვენი მიზანია მისი განმტკიცება ესტონეთის მიერ ევროკავშირის საბჭოს თავმჯდომარეობის პერიოდში, რომელიც ივლისში იწყება. როგორც იცით, 24 ნოემბერს ბრიუსელში გაიმართება აღმოსავლეთ პარტნიორობის სამიტი. ჩვენ უნდა უზრუნველვყოთ მაღალი რანგის წარმომადგენლობა და რეალური შედეგები ამ სამიტზე.მოვუწოდებ ჩემს ძვირფას კოლეგას, სრულად გამოიყენოს აღმოსავლეთ პარტნიორობის ესტონური ცენტრის მიერ უზრუნველყოფილი კონკრეტული გზები შესაბამისი მიზნების მისაღწევად და საქართველოში რეფორმების გასაღრმავებლად.ჩვენი თანამშრომლობა თავდაცვის, განათლების, ელექტრონული მმართველობის სფეროებში, ასევე - ევროკავშირთან დაკავშირებულ საკითხებზე, ძალიან პოზიტიურია.“- განაცხადა პემიერმა.

რატასის თქმით კვირიკაშვილთან შეხვედრის დროს მათ ეკონომიკური თანამშრომლობის კიდევ უფრო გაღრმავების გზები განიხილეს.

„შეხვედრაზე ჩვენ განვიხილეთ ჩვენს ქვეყნებს შორის ეკონომიკური თანამშრომლობის კიდევ უფრო გაღრმავების გზები. მიმაჩნია, რომ ამისთვის უზარმაზარი პოტენციალი არსებობს. ესტონური საგადასახადო მოდელის ადაპტირება ამის ნათელი მაგალითია. მეორე მხრივ, აუცილებელია ორმხრივი ინვესტიციების გაზრდაც.“- განაცხადა იური რატასმა.