აფხაზეთის ე.წ. მთავრობა - ტრამპის მიერ საქართველოს ტერიტორიული მთლიანობისადმი მხარდაჭერა აფხაზეთის იზოლაციას ემსახურება

პოლიტიკა - 16:34, 11 May, 2017

20172

ამერიკის შეერთებული შტატების მიერ საქართველოს ტერიტორიული მთლიანობის კიდევ ერთხელ, ამჯერად უკვე დოკუმენტურ აღიარებას ოკუპირებული აფხაზეთის დე ფაქტო საგარეო საქმეთა სამინისტრო ეხმაურება. საოკუპაციო რეჟიმი უკმაყოფილებას გამოთქვამს ამერიკის შეერთებული შტატების კონგრესისა და პრეზიდენტის მიერ მიღებული დოკუმენტის გამო, რომლის მიხედვითაც იმ ქვეყნებს, რომლებაც საქართველოს ოკუპირებული რეგიონები აფხაზეთი და ე.წ სამხრეთ ოსეთი დამოუკიდებელ ქვეყნებად აღიარეს, ამერიკის შეერთებული შტატებიდან დაფინანსება შეუწყდება:

„დასანანია, რომ ამერიკის ახალი ადმინისტრაცია საქართველოს აბსურდული მოთხოვნების მხარდაჭერით ჩიხურ გზაზე წავიდა, რაც მიზნად ისახავს აფხაზეთის კიდევ უფრო მეტ ბლოკადას და საერთაშორისო იზოლაციას.

თავს წარმოადგენენ რა, როგორც თავისუფლებისა და ადამიანის უფლებების დამცველად მთელ მსოფლიოში, აშშ-ის ლიდერები დაუფარავად ატარებენ ორმაგი სტანდარტის პოლიტიკას. პრაქტიკაში იყენებენ პოლიტიკურ და ფინანსურ ზეწოლას მათთვის არასასურველ სახელმწიფოეზე, ასევე იღებენ ყველა სახის შეზღუდვებსა და სანქციებს მათთვის მიუღებელ მოქალაქეებზე.

ვაშინგტონში უნდა აცნობიერებდნენ, რომ რომ მსგავსი პრაქტიკა „წამახალისებელია“ იმ ქვეყნისთვის, რომელმაც 2008 წელს წამოიწყო სამხრეთ ოსეთში და იღებს დისკრიმინაციულ კანონებს უცხო ქვეყნის მოქალაქეების მიმართ, როგორიცაა ოკუპირებული ტერიტორიების შესახებ კანონი, რაც არაფერ კარგს არ გამოიწვევს.

აუცილებელია ნათლად გვესმოდეს, რომ მხოლოდ აღიარებამ და სამხრეთ კავკასიაში არსებული პოლიტიკური რეალობების ადეკვატური აღქმამ შეიძლება შეუწყოს მხარეთა შორის დიალოგის დაწყებას. საქართველოს რევანშისტული პოლიტიკის წაქეზება და აფხაზეთის საერთაშორისო იზოლაცია ამ მიზანს მხოლოდ გაართულებს და გააბათილებს ჟენევის დისკუსიებში მონაწილეთა ძალისხმევას“- აღნიშნულია დე ფაქტო უწყების განცხადებაში.