მღვდელმსახურების მოტივით სამხედრო სავალდებულო სამსახურისგან თავის არიდება - გირჩის ნაბიჯის შემდეგ კანონში ცვლილება იგეგმება

პოლიტიკა - 15:51, 11 May, 2017

3070

პარლამენტის თავდაცვისა და უშიშროების კომიტეტი სამხედრო-სავალდებულო სამსახურში გაწვევისგან თავის არიდებასთან დაკავშირებით საკანონმდებლო ცვლილებებზე მუშაობს.

“შეიქმნა ხელოვნური ინსტრუმენტი კონსტიტუციური ვალებულებისაგან თავის ასარიდებლად. ეს არის ხელოვნურად შექმნილი, არის მცდელობა იმისა, რომ კანონის გარკვეული მუხლი გამოყენებულ იქნას კონსტიტუციური ვალდებულების საწინააღმდეგოდ, ამიტომ გავაკეთე პატარა სამუშაო ჯგუფი. არის რამდენიმე საშუალება, რომ კანონში მოხდეს მკაფიო განმარტება. ვმუშაობთ ამ საკითხზე“, - განაცხადა კომიტეტის თავმჯდომარემ ირაკლი სესიაშვილმა.

კომიტეტის დღევანდელ სხდომაზე ყურადღება სწორედ ორგანიზაცია “გირჩის“ მიერ რეგისტრირებული რელიგიური ორგანიზაციის შესახებ გამახვილდა.
შეგახსენებთ, რომ პარტია „გირჩის“ წევრებმა რელიგიური ორგანიზაცია „საქართველოს ქრისტიანული, ევანგელისტური, პროტესტანტული ეკლესია - ბიბლიური თავისუფლება“ დააფუძნეს. ორგანიზაციის დარეგისტრირება 2017 წლის მარტში მოხდა. აღნიშნული რელიგიური ორგანიზაცია სასულიერო პირებს აკურთხებს და შესაბამის ცნობასაც გასცემს. სასულიერო წოდების მქონე ახალგაზრდები კი შესაბამისი უწყებებისგან სავალდებულო სამხედრო სამსახურის გადავადებას ითხოვენ და მიზანსაც აღწევენ, რადგან კანონში არსებული ჩანაწერი მათ ამის საშუალებას აძლევს. სამხედრო ვალდებულებისა და სამხედრო სამსახურის შესახებ საქართველოს კანონის 30-ე "ლ" ქვეპუნქტის მიხედვით, წვევამდელს სამხედრო სამსახურში გაწვევა გადაუვადდება, თუ ის არის მღვდელმსახური ან სწავლობს სასულიერო სასწავლებელში.