"ზედმეტად ვერევით ქალის ორგანიზმის წარმართვის პროცესში"- საკომიტეტო მოსმენაზე აბროტზე იმსჯელეს

პოლიტიკა - 14:23, 11 May, 2017

3229

ადამიანის უფლებათა დაცვის კომიტეტი “საქართველოს დემოგრაფიული საზოგადოება 21” მიერ წარმოდგენილ საკანონმდებლო წინადადებას განიხილავს, რომელიც აბორტის აკრძალვასა და „ჯანმრთელობის დაცვის შესახებ“ საქართველოს კანონში ცვლილების შეტანას გულისხმობს.

დემოგრაფიული საზოგადოება 21-ის" საკანონმდებლო წინადადების მიხედვით 12 კვირამდე ორსულობის ნებაყოფლობით შეწყვეტა მხოლოდ იმ შემთხვევაში უნდა გახდეს დასაშვები, თუ:

1. ორსული წარმოადგენს ექიმ-გინეკოლოგის დასკვნას იმის შესახებ, რომ თუ ორსულობა დაუყოვნებლივ არ შეწყდება, ქალი დაიღუპება;

2. ორსული წარმოადგენს ორი ექიმ-გინეკოლოგის დასკვნას იმის შესახებ, რომ ორსულობის პროცესში ქალისა და ნაყოფის სიცოცხლეს საფრთხე ემუქრება;

3. ორსული წარმოადგენს ორი ექიმი-ფსიქიატრის დასკვნას, რომ თუ ორსულობა არ შეწყდება, არსებობს დიდი ალბათობა იმისა, რომ ქალმა სიცოცხლე სუიციდით დაამთავროს.

კანონპროექტის ინიციატორის ზვიად ტომარაძის თქმით, კანონპროექტის საჭიროება საქართველოში აბორტების დიდმა მასშტაბმა, რამაც ქვეყნის დემოგრაფიული ვითარება მნიშვნელოვნად დაამძიმა.

ზვიად ტომარაძის წინადადებას ქალის უფლებებში ზედმეტად ჩარევად მიიჩნევს უმრავლესობის წევრი დიმიტრი ცქიტიშვილი და აცხადებს, რომ გარკვეული შეზღუდვების დაწესებით ეს საკითხი ფარულ სივრცეში გადავა, რაც უზარმაზარ ზიანს მიაყენებს ქალის ჯანმრთელობას.

„არავინ ამბობს იმას, რომ აბორტი კარგია, მაგრამ რამდენიმე კომპონენტი შემოდის: უფლებრივი მდგომარეობა, საკითხი, რომელიც ერთმნიშვნელოვნად აძლევს ქალს უფლებას, თვითონ გადაწყვიტოს ეს და არ შეიძლება, ჩვენ, საზოგადოებამ და კანონმა დაუწესოს, როგორ მოიქცეს.ესმის, ეს ვიღაცისთვის მორალური საკითხია, მაგრამ არ შეიძლება, ერთი მსოფლმხედველობა თავს მოვახვიოთ მეორეს და ავკრძალოთ თავისუფალი არჩევანი. ცოტა ზედმეტად ვერევით ქალის ორგანიზმის წარმართვის პროცესში და ამიტომაც მგონია, რომ დაუშვებელია კანონის ამ ფორმით მიღება.“ - განაცხადა ცქიტიშვილმა.