კოალიაცია დამოუკიდებელი და გამჭვირვალე მართლმსაჯულების მიერ ორგანიზებულ კონფერენციას ევროკავშირის წარმომადგენლობის ელჩი საქართველოში, იანოშ ჰერმანი, ესწრება. შეხვედრის ფარგლებში მოსამართლეების უვადოდ განმწესების პრობლემაზე საუბრობენ. ჰერმანის განცხადებით, ასოცირების ხელშეკრულებით გათვალისწინებული ვალდებულებაა, რომ სასამართლო სისტემა იყოს დამოუკიდებელი, გამჭვირვალე და ყოველგვარი გავლენისგან თავისუფალი:

„ასოცირების ხელშეკრულებით გათვალისწინებული ვალდებულებაა, რომ სასამართლო სისტემა უნდა იყოს დამოუკიდებელი, გამჭვირვალე და ყოველგვარი გარეშე გავლენისგან თავისუფალი. ჩვენ ვაღიარებთ გარკვეულ პროგრესს, თუმცა მნიშვნელოვანია, რა გავლენა აქვს ამ ყველაფერს რეალურ ცხოვრებაში. აუცილებელია, რომ საზოგადოებაც და პოლიტიკური სუბიექტებიც გრძნობდნენ, რომ სასამართლო სისტემის გაუმჯობესება რეალურია. ასევე ძალიან მნიშვნელოვანია, რომ ამას გრძნობდნენ ბიზნეს სექტორშიც, რომ მათ შეეძლოთ სასამართლოს ნდობა და ფიქრობდნენ, რომ გადაწყვეტილება იქნება მაღალპროფესიული და დამოუკიდებელი,“ - განაცხადა იანოშ ჰერმანმა.