პრეზიდენტის წარმომადგენელი მოსამართლეთა დანიშვნის კენჭისყრაში მონაწილეობას არ მიიღებს

პოლიტიკა - 11:12, 11 May, 2017

1129

მოსამართლეთა დანიშვნის კენჭისყრაში მონაწილეობას არ მიიღებს იუსტიციის საბჭოში პრეზიდენტის წარმომადგენელი. ვახტანგ მჭედლიშვილი განმარტებებს იუსტიციის უმაღლესი საბჭოს ვებგვერდზე ავრცელებს. ვახტანგ მჭედლიშვილი ითხოვდა რომ კენჭისყრა საკონსტიტუციო სასამართლოს გადაწყვეტილების საფუძველზე გამოსაცდელ ვადასთან დაკავშირებულ რეგულაციებზე პარლამენტის შესაბამისი გადაწყვეტილების მიღების შემდეგ ჩატარებულიყო, თუმცა უშედეგოდ.

"პატივცემულო კოლეგებო, მსურს გაგიზიაროთ ჩემი მოსაზრება მოსამართლეთა შესარჩევ კონკურსთან დაკავშირებით. მოგეხსენებათ, რომ საქართველოს იუსტიციის უმაღლესი საბჭოს 2017 წლის 17 თებერვლის გადაწყვეტილებით საქალაქო და რაიონულ სასამართლოებში გამოცხადდა მოსამართლეთა შესარჩევი კონკურსი.

2017 წლის 31 მარტის სხდომაზე წარმოვადგინე ჩემი მოსაზრებები კონკურსის ჩატარებასთან დაკავშირებით, რომელიც გამომდინარეობდა საქართველოს საკონსტიტუციო სასამართლოს 2017 წლის 15 თებერვლის გადაწყვეტილებიდან. აღნიშნული გადაწყვეტილებით არაკონსტიტუციურად იქნა ცნობილი მოსამართლეთა გამოსაცდელი ვადა იმ კანდიდატებთან მიმართებით, რომლებსაც აქვთ მოსამართლედ მუშაობის არანაკლებ 3 წლის გამოცდილება. საბჭოს შევთავაზე, რომ პროცესის მიმართ ბუნდოვანებისა და გაუგებრობის თავიდან ასაცილებლად მოსამართლეთა შესარჩევ კონკურსზე კენჭისყრა ჩატარებულიყო მას შემდეგ, რაც საქართველოს პარლამენტი მიიღებდა არაკონსტიტუციურად ცნობილი ნორმის ალტერნატიულ ვერსიას, რომლის ვადაც საქართველოს საკონსტიტუციო სასამართლოს გადაწყვეტილებით განისაზღვრა მიმდინარე წლის 1 ივლისამდე. აღნიშნული წინადადება საბჭოს უმრავლესობის მიერ არ იქნა გაზიარებული."- აღნიშნულია მჭედლიშვილის განცხადებაში.