იუსტიციის უმაღლესი საბჭო მოსამართლეთა ხელახალ გამწესებაზე დღეს იმსჯელებს

პოლიტიკა - 11:11, 11 May, 2017

1113

იუსტიციის უმაღლესი საბჭო მოსამართლეების დანიშვნის საკითხზე კენჭისყრას დღეს გამართავს, გასაუბრება 109 კანდიდატმა გაიარა, ვაკანტური კი 39 ადგილია.

კენჭისყრით გადაწყდება უზენაესი სასამართლოს თავმჯდომარის მოადგილის, მიხეილ ჩინჩალაძის საკითხიც. საბჭოს მხარდაჭერის შემთხვევაში ჩინჩალაძე მოსამართლის თანამდებობაზე უვადოდ გამწესდება, რადგან ახლადამოქმედებული კანონმდებლობით, უზენაესი სასამართლოს ყოფილი მოსამართლეები, რომლებსაც 3-წლიანი სტაჟი აქვთ, თანამდებობაზე გამოსაცდელი ვადის გარეშე პირდაპირ უვადოდ გამწესდებიან. ჯერ-ჯერობით უცნობია იუსტიციის საბჭოს მდივნის საკითხი. შესაძლოა სწორედ ხვალ გახდეს ცნობილი, დაინიშნება თუ არა ლევან მურისიძე სააპელაციო სასამართლოში უვადო მოსამართლედ.

მოსმართლეობის კანდიდატების შერჩევაში არსებულ ხარვეზებზე საუბრობს არასამტავრობო სექტორი:

„ეს კონკურსი ხასიათდებოდა გამჭვირვალობის დაბალი ხარისხით. საყურადღებოა ის, რომ რამდენიმე კანდიდატმა, რომლის მიმართ არსებობს საზოგადოებრივი ინტერესი, გასაუბრების პროცესი საკუთარი სურვილით დახურა. მათ შორის არის მიხეილ ჩინჩალაძე, რომელიც არის უზენაესი სასამართლოს თავმჯდომარის პირველი მოადგილე და სისტემაში ერთ-ერთ ყველაზე გავლენიანი პირი. ასევე საკონსტიტუციო სასამართლოს ყოფილი მოსამართლე, ოთარ სიჭინავა და ასევე რუსთავი2-ის საქმის ერთ-ერთ მოსამართლე, შორენა ყაველაშვილი,“ - აცხადებს საერთაშორისო გამჭვირვალობა - საქართველოს იურისტი, ოლიკო შერმადინი.

კენჭისყრის პროცესში მონაწილეობაზე უარს აცხადებს საბჭოს ერთ-ერთი არამოსამართლე წევრი, ვახტანგ მჭედლიშვილი. ის ითხოვდა კენჭისყრა პარლამენტის შესაბამისი გადაწყვეტილების მიღების შემდეგ ჩატარებულიყო, თუმცა უშედეგოდ.

არასამთავრობოთა კრიტიკას უპასუხა უმაღლესი საბჭოს წევრმა, ევა გოცირიძემ. გოცირიძე ბრალდებებს "უსაფუძვლოს" უწოდებს და ამბობს, რომ გასაუბრების პროცესი 98%-იანი გამჭვირვალობით იმართება.