ახალი მხედრიონის შექმნის რისკი - პრეზიდენტის შეხვედრაზე უსაფრთხოების ახალი სისტემის ხარვეზებზე ისაუბრეს

პოლიტიკა - 16:37, 10 May, 2017

4729

საქართველოს პრეზიდენტმა და ეროვნული უშიშროების საბჭოს მდივანმა „თბილისის სტრატეგიული დისკუსიის“ ფორმატში დღეს საკონსტიტუციო ცვლილებებიდან გამომდინარე უსაფრთხოების სისტემაზე სასაუბროდ დიპლომატებს, საკანონმდებლო, აღმასრულებელი და არასამთავრობო ორგანიზაციების წარმომადგენლებს უმასპინძლეს. კონფერენციაზე მოწვეულ სტუმრებს გიორგი მარგველაშვილმა საკონსტიტუციო ცვლილებების პროექტთან მიმართებაში უსაფრთხოების ახალი სისტემის ხარვეზებისა და გამოწვევების შესახებ საკუთარი მოსაზრებები გაუზიარა.

მმართველი გუნდის მიერ წარმოდგენილი კონსტიტუციის პროექტის მიხედვით, რომელიც უშიშროების საბჭოს გაუქმებისა და ქვეყანაში დამატებითი სამხედრო ძალის გაჩენის გულისხმობს, შეკითხვები გაუჩნდათ ოპოზიციური პარტიის წარმომადგენლებსა და თავდაცვის ყოფილ მინისტრს.

თუ სხვა შეიარაღებული ძალები გვინდა, რომ დავუშვათ კონსტიტუციით, მაშინ ისევე უნდა იყოს რეგულირებული და გაწერილი მათი გამოყენებისა და მოქმედების წესი, როგორც არის სამხედრო ძალების, წინააღმდეგ შემთხვევაში, მართლა ძალიან დიდი ხვრელი იქმნება, რომელიც შემდეგ შეიძლება, ძალიან ბოროტად იქნეს გამოყენებული,“ - განაცხადა ევროპული საქართველოს წევრმა, სერგი კაპანაძემ.

საქართველოს თავდაცვის ყოფილი მინისტრი, თინა ხიდაშელი, მიიჩნევს, რომ ცუდი მმართველის პირობებში ამგვარად შესაძლოა, ქვეყანაში ახალი მხედრიონი გაჩნდეს.

„თქვენ უბრალოდ მხედრიონს შექმნით ამ ქვეყანაში ამ კონსტიტუციური პროექტით, თუ ერთხელ კიდევ უპასუხისმგებლო ლიდერი გაჩნდება საქართველოში,“ - განაცხადა თინა ხიდაშელმა.