უმრავლესობის დეპუტატი ომბუდსმენს უდანაშაულობის პრეზუმპციის დარღვევაში ადანაშაულებს

პოლიტიკა - 15:50, 10 May, 2017

1034

საპარლამენტო უმრავლესობის წევრები სახალხო დამცველს ტყიბულში მომხდარ ტრაგედიასთან დაკავშირებით გაკეთებული განცხადების გამო უდანაშუალობის პრეზუმპციის დარღვევაში ადანაშაულებენ. ანრი ოხანაშვილის თქმით, უბედური შემთხვევისგან არც ერთი ქვეყანა და მაღალგანვითარებული საწარმო თუ შახტა დაზღვეული არ არის, რადგან წინასწარ ვერ გათვლი, თუკი იქ რაიმე მნიშვნელოვან დარღვევას არ ჰქონდა ადგილი.

"ამიტომ, ეს ყველაფერი გამოძიებამ უნდა დაადგინოს. არ არის სწორი, სახალო დამცველმა ვინმეს მკვლელი უწოდოს, როცა სწორედ მან თითოეული ადამიანი უდანაშაულობის პრეზუმციის დარღვევისგან უნდა დაიცვას. სახალხო დამცველი მკვლელს უწოდებს იმ ადამიანებს - არ ვიცი, პარლამენტის წევრებს, მთავრობას, ყველას. სახალხო დამცველის პოზიციიდან გაკეთებული განცხადება არაკორექტულია. რა თქმა უნდა, სახალხო დამცველს აქვს უფლება დააფიქსიროს, რომ შეშფოთებულია მომხდართან დაკავშირებით და ვინმეს კიდევ ერთხელ მოუწოდოს, მაგრამ სახალხო დამცველი, რომელმაც საზოგადოების, თითოეული ჩვენგანის უფლება უნდა დაიცვას, ვინმეს მკვლელს არ უნდა უწოდებდეს. ეს ძალიან არაპროფესიონალური, არაკორექტული შეფასებაა. სახალხო დამცველის მხრიდან ასე პოზიციის დაფიქსირება, ძალიან ცუდია", - განაცხადა ოხანაშვილმა.

შეგეხსენებთ სახალხო დამცველმა ტყიბულში მომხდარი უბედური შემთხვევის გამო იმ პირებს რომლებიც შრომის ინსპექციის ამოქმედებას ეწინააღმდეგებიან მკვლელები უწოდა.