"მუდმივად იყო საუბარი, ვინ მივა და ვინ არ მივა უშიშროების საბჭოზე, თითქოს პრეზიდენტის დაბადების დღის მილოცვაზეა საუბარი"- მარგველაშვილი

პოლიტიკა - 14:32, 10 May, 2017

1361

უსაფრთხოების საკითხებისადმი მიძღვნილ კონფერენციაზე საქართველოს პრეზიდენტმა უშიშროების საბჭოს და კონსტიტუციის ახალი პროექტის მიხედვით ამ უწყების გაუქმების საკითხზე ისაუბრა. გიორგი მარგველაშვილის თქმით, როდესაც უშიშროების საბჭო უქმდება და პრეზიდენტს აღარ აქვს სათათბირო ორგანო, შესაძლოა, უმაღლესი მთავარსარდლის არსებობა აზრს კარგავს.

პრეზიდენტმა მმართველი გუნდის უშიშორების საბჭოსადმი დამოკიდებულებაზეც ისაუბრა და აღნიშნა რომ მუდმივად იყო საუბარი, ვინ მივა და ვინ არ მივა უშიშროების საბჭოს სხდომაზე. თითქოს პრეზიდენტის დაბადების დღის მილოცვაზეა საუბარი:

„მუდმივად იყო საუბარი, ვინ მივა და ვინ არ მივა უშიშროების საბჭოს სხდომაზე. თითქოს პრეზიდენტის დაბადების დღის მილოცვაზეა საუბარი, მიულოცავენ თუ არა დაბადების დღეს, ან ანგელოზის დღეს“- განაცხადა გიორგი მარგველაშვილმა.

საქართველოს პრეზიდენტი თვლის, რომ, როდესაც ქვეყნის ტერიტორიის 20% ოკუპირებულია და ჰიბრიდული ომების საშიშროება არსებობს, უშიშროების საბჭოს გაუქმება არაადეკვატურია.

„მინისტრი მოვა თუ არ მოვა, პრემიერი დაესწრება, თუ არ დაესწრება, ამ რეჟიმში გადავიდა საომარ მდგომარეობაში არსებული ქვეყნის თავდაცვისუნარიანობაზე საუბარი,“ - განაცხადა გიორგი მარგველაშვილი.

მან ყველას მოუწოდა, ქვეყნის თავდაცვისუნარიანობის საკითხზე ერთად და თავდადებით იმუშაონ.

„გვერდზე გადავდოთ ყველამ ჩვენი პოლიტიკური თამაშები, პიროვნული ურთიერთობები, ამისთვის საკმარისი სფერო გვაქვს, სადაც ერთმანეთს შეგვიძლია რიტორიკულად ვიკამათოთ,“ - განაცხადა გიორგი მარგველაშვილმა.