საკონსტიტუციო რეფორმის ფართო დისკუსიებით ოპოზიცია, ხელისუფლება და საზოგადოება ერთმანეთისკენ სავალ გზას ეძებენ- პრეზიდენტი

პოლიტიკა - 19:45, 09 May, 2017

1255

საქართველოს პრეზიდენტმა ზუგდიდელებს საყოველთაო საკონსტიტუციო განხილვებში აქტიური მონაწილეობისათვის მადლობა გადაუხადა და აღნიშნა, რომ ფართო მასშტაბის დისკუსიები ყოველთვის ენერგიის და ინტერესის მიმცემია პოლიტიკოსებისათვის.

„ასეთი დისკუსიები უნდა გავაგრძელოთ კიდევ უფრო ინტენსიურად. არამარტო ზუგდიდში, არამედ ყველგან, სადაც შეიძლება შევკრიბოთ ხალხი.

გიორგი მარგველაშვილის განცხადებით, იგი მიესალმება ყველა წამოწყებას, რომელიც ეხება კონსტიტუციას, იქნება ეს არასაპარლამენტო პარტიების ფორმატში, თუ არასამათავრობო ორგანიზაციების ფორმატში.

,,ასეთი ფართოდ გაშლილი დისკუსია ქვეყნის უზენაესი კანონის შესახებ არის არა დაპირისპირების, არამედ პირიქით ერთიანი თანხმობისკენ მისვლის გზა.

როდესაც მთელი საზოგადოება ვსაუბრობთ ამ საკითხებზე, ჩვენ ვეძებთ ერთმანეთთან მისასვლელ გზებს და ასე ძლიერდება ქვეყანა და ერი“, - განაცხადა გიორგი მარგველაშვილმა ზუგდიდში მოსახლეობასთან შეხვედრის შემდეგ.

საქართველოს პრეზიდენტის განცხადებით, ყველა პოლიტიკური ძალა, როგორც ოპოზიცია, ასევე ხელისუფლება მოუსმენს ხალხის ხმას და ყველა ერთად მივა კონსენსუსამდე.

„შეუძლებელია დემოკრატიის საპირისპიროდ მოძრაობა. ეს შეუძლებელია როგორც ოპოზიციისთვის, ასევე ხელისუფლებისთვის“ ,- აღნიშნა გიორგი მარგველაშვილმა.