„ხელისუფლებისგან ლუჟკოვის შემოშვება ნაკლებად გასაკვირია, მათი კურსი არის

„ხელისუფლებისგან ლუჟკოვის შემოშვება ნაკლებად გასაკვირია, მათი კურსი არის - რუსეთი არ გავაღიზიანოთ“

პოლიტიკა - 17:13, 08 May, 2017

2498

მოსკოვის ყოფილი მერის იური ლუჟკოვის საქართველოში ვიზიტმა ექსპერტებისა და პოლიტიკოსების მხრიდან მწვავე რეაქცია გამოიწვია.

როგორც ლუჟკოვი ამბობს, ის ქვეყანაში ტურისტული მიზნებით იმყოფება. მოსკოვის ყოფილი მერი საქართველოში ოთხი დღის წინ სომხეთიდან ჩამოვიდა.

შეგახსენებთ, რომ მოსკოვის ყოფილი მერი იური ლუჟკოვი აფხაზეთსა და ცხინვალის რეგიონში 2009 წელს იმყოფებოდა, რასაც საქართველოს საგარეო სამინისტროს პროტესტი მოჰყვა.

ამასთან, “ოკუპირებული ტერიტორიების შესახებ” საქართველოს კანონის მიხედვით, უცხო ქვეყნის მოქალაქეებისთვის საქართველოს ოკუპირებულ ტერიტორიებზე შესვლა დაშვებულია მხოლოდ: ა) აფხაზეთის ავტონომიური რესპუბლიკის ტერიტორიებზე – ზუგდიდის მუნიციპალიტეტის მიმართულებიდან; ბ) ცხინვალის რეგიონში (ყოფილი სამხრეთ ოსეთის ავტონომიური ოლქის ტერიტორიებზე) – გორის მუნიციპალიტეტის მიმართულებიდან. ყველა სხვა მიმართულებიდან ოკუპირებულ ტერიტორიებზე შესვლა უცხო ქვეყნის მოქალაქეებისათვის და მოქალაქეობის არმქონე პირებისთვის აკრძალულია და ისჯება საქართველოს სისხლის სამართლის კოდექსით.

"ნიუპსოტი" შეფასებისთვის ექსპერტ თორნიკე შარაშენიძეს დაუკავშირდა. ჯიპა-ს პროფესორი ამბობს, რომ “ოკუპირებული ტერიტორიების შესახებ” კანონი რეალურად არ მუშაობს. მმართველ პარტიას კი ამ კანონის კიდევ უფრო შერბილების მცდელობა ბევრჯერ ჰქონდა.

"საიდუმლო არ არის, რომ ოკუპაციის კანონი დიდი ხანია არ მუშაობს, ან თუ მუშაობს ძალიან შერჩევითად. შეიძლება ვიღაც ძალიან გაჭირვებული გააჩერონ და არ შემოუშვან და გააბრუნონ უკან. ვიღაც ძალიან ოდიოზური, რომელიც აშკარად მუშაობს რუსულ სპეცსამსახურებზე, ლუჟკოვისნაირებს სამწუხაროდ არ ან ვერ აკავებენ. ათასი ვიღაცაა ლუჟკოვისნაირი ვისაც პირდაპირ, ღიად აფხაზეთში ან სამაჩაბლოშია ნამყოფი, მაგრამ მოდის. იმიტომ რომ კანონი არ მუშაობს. კანონის შერბილების მცდელობა იყო, თუმცა ორივეჯერ დაანებეს თავი, რადგან რეალურად შერბილების საჭიროება არ იყო, რადგან კანონი არ მუშაობს"- განაცხადა თორნიკე შარაშენიძემ.

მისივე შეფასებით, ლუჟკოვის შემოშვება არ გაჰკვირვებია. "რუსეთის არგაღიზიანების პოლიტიკის" გათვალისწინებით შარაშენიძისთვის ის უფრო მოულოდნელი აღმოჩნდა, რომ მესაზღვრეებმა "ღამის მგლები" საზღვრიდან უკან გააბრუნეს.

"რეალისტურად ვიმსჯელოთ, ამ ხელისუფლებისგან გაგვიკვირდა რომ ღამის მგლები არ შემოუშვა, ლუჟკოვი რომ შემოუშვა ნაკლებად გასაკვირია. ვერც მოვთხოვდი ამ ხელისუფლებას, ლუჟკოვი არ შემოეშვა, უფრო გამიკვირდა რომ "ღამის მგლები" არ შემოუშვა. მათი კურსი ისევ და ისევ არის ის, რომ რუსეთი არ გავაღიზიანოთ"- განმარტა ექსპერტმა.

რაც შეეხება იური ლუჟკოვს, საქართველოში კანონდარღვევით შემოსული მოსკოვის ყოფილი მერი პოლიტიკურ განცხადებებს არ ერიდება და აცხადებს, რომ "აფხაზეთისა და ცხინვალის რეგიონის ჩამოშორების შემდეგ, საქართველო უკეთ იგრძნობს თავს".