პარლამენტის თავმჯდომარის, ირაკლი კობახიძის განცხადებით, შემოთავაზებული საკონსტიტუციო ცვლილებებით პრეზიდენტის სტატუსი უცვლელი რჩება. ირაკლი კობახიძის თქმით, პრეზიდენტი ისევ იქნება სახელმწიფოს მეთაური, უმაღლესი მთავარსარდალი და წარმომადგენელი საგარეო ურთიერთობებში. როგორც კობახიძემ აღნიშნა, პეზიდენტის უფლებამოსილებების ცვლიებები ვენეციის კომისიის რეკომენდაციების გავალისწინებით მოხდა:

„ უფლებამოსილებებში გვაქვს ორი არსებითი ცვლილება. პირველი - საქმე ეხება უზენაესი სასამართლოს მოსამართლეთა წარდგენას და აქ გვაქვს 2010 წლის ვენეციის კომისიის რეკომენდაცია, სადაც შავით თეთრზე წერია, რომ უმჯობესია ამ კომპეტენციის იუსტიციის უმაღლესი საბჭოსთვის გადაცემა, რათა ინსტიტუციურად უკეთესად მოგვიწესრიგდეს ეს საკითხი და მეორე, საქმე ეხება ეროვნული უშიშროების საბჭოს. საუბარია ეროვნული უშიშროების საბჭოს ჩანაცვლებაზე თავდაცვის საბჭოთი, რომელიც მოქმედებს საომარი მდგომარეობის პირობებში. ესეც იყო ვენეციის კომისიის რეკომენდაცია 2010 წელს. ისინი პირდაპირ ამბობდნენ, რომ ამ სისტემასთან საერთო არაფერი აქვს არსებული სახით უშიშროების ეროვნულ საბჭოს, რადგან ეროვნული უშიშროების საბჭო რჩევას აძლევს პრეზიდენტს იმ საკითხებზე, რომელიც არის რეალურად მთავრობის უფლებამოსილების ქვეშ. ეს არის მარტივი იურიდიული ნონსენსი. ისინი ჯერ კიდევ 2010 წელს გვირჩევდნენ ამ ნონსენსის გამოსწორებას. რაც არ გაკეთდა მაშინ, კეთდება დღეს. ჩვენი ამოცანა იყო დაუხვეწავი საპარლამენტო სისტემა შეგვეცვალა დახვეწილი საპარლამენტო სისტემით. ეს იყო ვენეციის კომისიის 2010 წლის რეკომენდაცია. მაშინ ვენეციის კომისიამ გვითხრა ის, რომ კარგია საპარლამენტო რესპუბლიკის მიმართულებით სვლა, თუმცა ვენეციის კომისიის რეკომენდაციის თანახმად, ეს ნაბიჯი ბოლომდე იყო მისაყვანი და ჩამოსაყალიბებელი იყო სრულფასოვანი საპარლამენტო მმართველობის სისტემა. ეს ამოცანა სრულდება იმ ცვლილებებით, რომელიც არის შემოთავაზებული. რას ითვალისწინებს ახალი სისტემა? არის სამი ძირითადი შტო ხელისუფლებაში - ეს არის საკანონმდებლო ხელისუფლება, აღმასრულებელი ხელისუფლება და სასამართლო ხელისუფლება. ამ სამ ხელისუფლებას განასახიერებს საქართველოში, ერთ შემთხვევაში, საქართველოს პარლამენტი, მეორე შემთხვევაში - საქართველოს მთავრობა, ხოლო მესამე შემთხვევაში - სასამართლო ხელისუფლება. მთავარი არსი მდგომარეობს იმაში, რომ უნდა ჩამოყალიბდეს ძლიერი პარლამენტი, ქმედითი მთავრობა, დამოუკიდებელი სასამართლო და მეოთხე უმნიშვნელოვანესი ელემენტი ამ სისტემის არის ზეპარტიული პრეზიდენტი, რომელიც უნდა უზრუნველყოფდეს სისტემის საერთო ფუნქციონირებას“, - განაცხადა ირაკლი კობახიძემ.