„პრორუსული იდეებისა და ძალებისთვის ადგილი გორშიც არ არის''- კომუნისტების მიტინგს გორელები ევროპის დღეებს უპირისპირებენ

პოლიტიკა - 14:10, 08 May, 2017

2767

ხვალ 9 მაისია, ფაშიზმზე გამარჯვების დღე. ამ დღეს გორელებისთვის სხვა დატვირთვაც აქვს, წინა წლების მაგალითით თუ ვიმსჯელებთ ნაომარი ქალაქი ხვალაც „გაწითლდება“ და ისევ გახდებიან ადგილობრივები პრორუსული და ანტიდასავლური განცხადებების მომსწრნენი.

ეს იმ პირებისგან რომლებიც ყოველ 9 მაისს, საბჭოთა სიმბოლიკით და რუსული დროშებით ხელში, ნაომარ ქალაქში საბჭოთა დიქტატორის ძეგლის აღმართვას ითხოვენ.

შეკრებილების უმრავლესობა პრაქტიკა გვიჩვენებს, რომ გორელი არ არის და სტალინის საზოგადოების წარმომადგენლები საქართველოს სხვადასხვა კუთხეებიდან იკრიბებიან. არა და გორელი სტალინელები 2010 წლის შემდეგ ამტკიცებენ, რომ ბრინჯაოს ძეგლის დაბრუნებას და ქალაქში მისთვის მოწყობილ კვარცხლბეგზე აღმართვას, სწორედ გორელები ითხოვენ.

სტალინელების მიტინგის პარალელურად გორში ევროპის დღეებს აღნიშნავენ, საინიციატივო ჯგუფი, ორი დღის განმავლობაში დემოკრატიული ღირებულებების შესახებ ინფორმაციის გავრცელებას და ამ ფასეულობების ირგვლივ საზოგადოების გაერთიანებას შეეცდება.

ღონისძიებები დღეს იწყება და ხვალ მასშტაბურ სახეს მიიღებს.

„ჩვენი კამპანიით ვამბობთ, რომ პრორუსული იდეებისა და ძალებისთვის ადგილი გორშიც არ არის. მიუხედავად იმისა, რომ ყოველ 9 მაისს ვხედავთ მათ აქტივობებს წითელი დროშების თანხლებით, მიგვაჩნია, რომ ეს თავსმოხვეული ინიციატივაა, რომელიც საზოგადოების რეალურ განწყობებს არ ასახავს. გვჯერა, რომ დემოკრატიული პრინციპებისადმი ერთგულება ყველა პოლიტიკური ძალისა თუ პროფესიის წარმომადგენელს აერთიანებს. ჩვენი კამპანიაც სწორედ ამ იდეის ხორცშესხმაა - ჩვენ უარს ვეუბნებით ტოტალიტარულ რეჟიმებს და ვირჩევთ პროგრესს “– აცხადებს საინიციატივო ჯგუფის წარმომადგენელი გვანცა დოლუაშვილი „ნიუპოსტთან“ საუბრისას.

ევროპის დღეების ფარგლები გამართული ღონისძიებები 20:00 საათზე - აქცია-კონცერტით „ჩვენ ვირჩევთ პროგრესს“ დაიხურება. რომელიც გორის თეატრის სკვერში გაიმართება და მასში მონაწილეობას „კანუდოსი“, „არა“, „დაგდაგანი“, „წერილი“, „იბერბენდი“ მიიღებენ.