10 მილიონამდე ლარი მაღალი თანამდებობის პირების ჯიბეში მიდის - ვაშაძე სკანდალურ ინფორმაციას ავრცელებს

პოლიტიკა - 13:50, 08 May, 2017

2434

ახალი საქართველო თბილისის მერიას, გამგეობებს და თბილისის საკრებულოს კორუფციაში ადანაშაულებს. გიორგი ვაშაძემ დღეს სოციალურად დაუცველი მოსახლეობისთვის გახსნილ უფასო სასადილოების საკითხზე გაამახვილა ყურადღება.

ვაშაძის მტკიცებით, 39 ათას 251 რეგისტრირებული ბენეფიციარიდან 20 ათასზე მეტი უფასო სასადილოებით არ ან ვერ სარგებლობს, მერია კი 39 ათასზე მეტი ბენეფიციარისთვის განკუთვნილ თანხას ურიცხავს კომპანიებს.

ახალი საქართველოს ლიდერი აცხადებს, რომ 10 მილიონამდე ლარი მაღალი თანამდებობის პირების ჯიბეში მიდის.

„საქმე ეხება უფასო სასადილოებს, რის ხარჯზეც ყოველწლიურად, დაახლოებით 8-10 მილიონ ლარს ჯიბეში იდებენ გამგეობის, მერიის და საკრებულოს მაღალი თანამდებობის პირები. ეს არის სისტემური კორუფციის უპრეცენდენტო სქემა, რომელიც დღეს საქართველოშია შექმნილი. კერძოდ, საქმე ეხება 39 251 ბენეფიციარს, რომლებიც თითქოსდა უფასოდ უნდა იკვებებოდეს ყოველდღიურად თბილისში. სამწუხაროდა, მონიტორინგის შედეგებმა დაადგინა, რომ ნახევარზე მეტი, 20 ათასზე მეტი ბენეფიციარი, რიგი ბარიერებისა და ხელოვნურად შექმნილი პრობლემების გამო, ამ უფასო სასადილოებში ვერ ან არ დადის. მერია კი უკლებლივ თითოეულ თეთრს ურიცხავს კომპანიებს ყოველთვიურად, შესაბამისად, წელიწადში 16-17 მლნ ლარს. აქედან 8-10 მლნ ლარი ნაწილდება სწორედ კომპანიის წარმომადგენელებზე, მაღალი თანამდებობის პირებზე და მათზე, რომლებიც ამაზე დგანან. ხელოვნურად არის შექმნილი პირობები, როდესაც 7 ათასზე მეტი ადამიანი თითქოსდა იმყოფება უფასო სასადილოების რიგში“, - განაცხადა ვაშაძემ.