"ღამის მგლები" გურიაში თავისუფლად დადიან- ,,გეორგიევსკის ლენტები ჩამოვართვით და დავწვით”

პოლიტიკა - 21:45, 07 May, 2017

19122

ლანჩხუთში "ღამის მგლები" გამოჩნდნენ, დღეს დაჯგუფების ორი წევრი რამდენიმე წუთის განმავლობაში ლანჩხუთი-ბათუმის დამაკავშირებელ მთავარ მაგისტრალზე მოძრაობდნენ.

ამის შესახებ ინფორმაციას ოზურგეთის ენმ-ის ლიდერები ავრცელებენ და დამადასტურებელ ფოტო-ვიდეო მასალასაც ავრცელებენ.

როგორც ენმ-ის ლიდერი ოზურგეთში, საკრებულოს დეპუტატი დავით მჟავანაძე ჩვენთან საუბარში აცხადებს, ორი ბაიკერი მათ სოფელ ლესის ტერიტორიაზე შენიშნეს, მოგვიანებით კი ლანჩხუთის ცენტრში მათ ე. წ გეორგიევსკის ლენტები ჩამოართვეს და დაწვეს:

"ორი ბაიკერი იყო, "ღამის მგლების" დაჯფუგების წევრები, რადგან ტანსაცლემზე ჰქონდათ სპეციალური ლოგოები და ეკეთათ ე. წ გეორგიევსკის ლენტები. რასაც მანქანიდან ვაკვირდებოდით, გააჩერა პატრულმა, შეუმოწმა საბუთები და გაატარა ჩვეულებრივად. ჩვენ უკან გავყევით, ლანჩხუთის ცენტრთან მოძრაობა იყო შეზღუდული და ბაიკერები გაჩერდნენ. მივედით მათთან და ვკითხეთ, იყვნენ თუ არა ისინი "ღამის მგლების" წევრები. დაგვიდასტურეს რომ იყვნენ. ლოგოები ეკეთათ ქურთუკზე და ჰქონდათ ასევე გეორგიევსკის ლენტები. გამოვართვით ის ლენტები და მათი თანდასწრებით დავწვით, ავუხსენით რომ ეს იყო რუსული პროპაგანდის ნაწილი და ეს ჩვენთვის იყო მიუღებელი. თავისუფლად გააგრძელეს მოძრაობა. ხელისუფლებამ ნაცარი მოგვაყარა თვალებში. მათთვის მთავარი ის არის, რა ასიამოვნოს კრემლს და როგორ გაუწიოს ანგარიში რუსეთის ლიდერს. გააკეთეს განცხადება, რომ ისინი ქვეყანაში არ შემოვიდოდნენ, მაგრამ ფაქტი სახეზეა, "ღამის მგლები" გურიაშიც თავისუფლად გადაადგილდებიან, რაც მოწმობს იმას, რომ ხელისუფლება საკუთარ მოსახლეობას უბრალოდ ეთამაშება"-გვითხრა დავით მჟავანაძემ.

"გურიის მოამბეს" გასულ კვირასაც მიაწოდეს ინფორმაცია იმის შესახებ, რომ რუსი ბაიკერები სოფელ ლესაში გამოჩნდნენ. ექვსი ბაიკერი მაშინ ბათუმის მიმართულებით გადაადგილდებოდა. თვითმხილველებმა გვითხრეს, რომ მაშინ მათ არც სპეციალური ლოგოები ჰქონდათ ტანსაცმელზე და არც ლენტები.