მერიის მოსახლეობამ ოზურგეთი-ურეკის ავტომაგისტრალი გადაკეტა

პოლიტიკა - 12:58, 05 May, 2017

2737

ამ წუთებში ოზურგეთის მუნიციპალიტეტის სოფელ მერიაში აქცია მიმდინარეობს.

ადგილობრივებმა გზა გადაკეტეს. ისინი, ოზურგეთი-ურეკის ავტომაგისტრალის მერია-ჭახვათას მონაკვეთზე მძიმეწონიანი მანქანების მოძრაობას აპროტესტებენ, რის გამოც გზა მთლიანად მწყობრიდანაა გამოსული.

"აუტანელია უკვე აქ გაჩერება. საშინელი მტვერია. დავიხრჩვით. ბავშვები გვყავს, ფანჯარა ხომ უნდა გავაღოთ, ჰაერი გვინდა. ამ მძიმეწონიანმა მანქანებმა, მთლიანად მწყობრიდან გამოიყვანეს გზა. ვითხოვთ სასწრაფოდ მოხდეს გზის შეკეთება და მოგვეცეს ნორმალურად ცხოვრების საშუალება"- აცხადებენ აქციაზე შეკრებილები.

მათი თქმით, გზა მანამ იქნება გადაკეტილი, სანამ ადგილობრივი ხელისუფლება პრობლემას სრულად არ მოაგვარებს.

აქციაზე შეკრებილებს ოზურგეთის მუნიციპალიტეტის გამგებელი მერაბ ჭანუყვაძე შეხვდა.

როგორც ის ადგილობრივებთან აცხადებს, გზის მოასფალტება სამ დღეში დაიწყება, პრობლემა კი უახლოეს დღეებში სრულად მოგვარდება:

"სამ დღეში დაიწყება მერია-ჭახვათის გზის მონაკვეთის მოასფალტება. დღეიდან, სამუშაოების დაწყებამდე, დღეში რამდენჯერმე სპეციალური ტექნიკით მოხდება აღნიშნული მონაკვეთის მორწყვა, რომ მოსახლეობა მტვერმა არ შეაწუხოს. ვმუშაობთ ასევე ალტერნატიული გზის გაყვანაზე, მძიმე ტექნიკამ რომ ამ გზაზე აღარ იმოძრაოს"-აღნიშნა გამგებელმა.