საკონსტიტუციო ცვლილებების საყოველთაო სახალხო განხილვა დაიწყო. საორგანიზაციო კომისია პირველ სხდომას ამ წუთებში ქუთაისში მართავს, რომელსაც საქართველოს პარლამენტის თავმჯდომარე ირაკლი კობახიძე ხელმძღვანელობს.

ცვლილებების პროექტი საარჩევნო სისტემის ცვლილებას და პრეზიდენტის არჩევის წესის შეცვლას ითვალისწინებს. პროექტში ამოღებულია ის თავი, რომელიც პარლამენტის ადგილმდებარეობას განსაზღვრავს.

აღნიშნულ პროცესში მონაწილეობს „ევროპული საქართველოც“. მათ რიგებში კეთდება განცხადებები იმასთან მიმართებით თუ რა შეკითხვები ექნებათ საყოველთაო სახალხო განხილვის დროს. მათი ძირითადი შეკითხვა უკავშირდება საარჩევნო სისტემის ცვლილებას და გადაუნაწილებელ მანდატებს. მათი თქმით, გადაუნაწილებელი მანდატები გამარჯვებულ პარტიას არ უნდა მიეკუთვნოს. ისინი ასევე ამბობენ, რომ პრეზიდენტი პირდაპირი წესით უნდა აირჩეოდეს.

„ქართული ოცნება ქუთაისს უკარგავს საპარლამენტო ქალაქის სტატუსს, ეს გადაწყვეტილება მიიღეს და ამოიღეს ქუთაისი, როგორც საპარლამენტო დედაქალაქი კონსტიტუციის პროექტიდან. მათ შემოგვტავაზეს სრულიად მიუღებელი საარჩევნო სისტემა, რომელიც პრაქტიკულად მოახდენს პირველი პარტიის ხელში ძალაუფლების უზურპაციას, ეს არის მოდელი, რომელიც მუსოლინის დროს არის შემუშავებული. სამარცხვინოა, რომ 21-ე საუკუნეში ასეთი ტიპის მოდელი შეიძლება იყოს შეთავაზებული საქართველოს მსოახლეობისთვის და მესამე ის, რომ საქართველოს მოსახლეობის აბსოლუტური უმრავლესობის პოზიციის მიუხედავად, ისინი ართმევენ ქართველ ხალხს პრეზიდენტის არჩევის უფლებას“, - აცხადებს სერგი კაპანაძე.