დღეს 11:00 საათზე მოძრაობა "დაიცავი კონსტიტუცია" რუსთაველის მეტროსთან კონსტიტუციის განხილვის კამპანიის ფარგლებში, მოსახლეობასთან შეხვედრას გამართავს და საინფორმაციო ბუკლეტებს დაარიგებს. 



18:00 საათზე რიყის სკვერში გაიმართება მოძრაობის "დაიცავი კონსტიტუცია" შეხვედრა მოქალაქეებთან.

„ეროვნულ-დემოკრატიული პარტიის“ ლიდერი ბაჩუკი ქარდავა აღნიშნავს, რომ მათი დღისწესრიგი ითვალისწინებს ხალხის მობილიზებას და მათ საქმის კურსში ჩაყენებას საკონსტიტუციო ცვლილბებთან მიმართებით, თუ რას ნიშნავს ეს:

„ჩვენ ვგეგმავთ ჩვენს დღისწესრიგს და ეს იქნება ძირითადად ხალხის მობილიზება და მათი საქმის კურსში ჩაყენება იმასთან დაკავშირებით, რომ მათ ართმევენ არჩევანის უფლებას“, - აღნიშნავს ბაჩუკი ქარდავა.

„ნაციონალური მოძრაობის“ ლიდერის ნიკა მელიას განცხადებით, ისინი რეალურ ხალხთან მისვლას და იმის ახსნას აპირებენ, თუ რას გულისხმობს დაგეგმილი საკონსტიტუციო ცვლილებები:

„მმართველი გუნდი აპირებს შეხვედრას გამგეობის თანამშრომლებთან, გუბერნიის თანამშრომლებთან, საჯარო მოხელეებთან, ანუ „ქართული ოცნების“ აქტივთან აპირებს შეხვედრას. ჩვენ რეალურ ხალხთან მისვლას ვაპირებთ და ახსნას იმისას თუ რას გულისხმობს ის საკონსტიტუციო ცვლილებები, რომელიც ბიძინა ივანიშვილმა განახორციელა და უნდა, რომ განახორციელოს ხალხის ნების ზურგშექცევით“, - აცხადებს „ერთიანი ნაციონალური მოძრაობის“ ლიდერი ნიკა მელია.

„ახალი მემარჯვენეების“ ლიდერი მამუკა კაციტაძე კი განმარტავს, რომ „ჭაბუკი პოლიტიკოსები სადიპლომო ნაშრომის კონსტიტუციად ქცევას აპირებენ“:

„მიმაჩნია, რომ ამ ვოიაჟის გათეთრებაც არ უნდა ვაცადოთ „ქართულ ოცნებას“, გვექნება ჩვენი ურთიერთობა, ჩვენი ახსნა, ჩვენი კონტაქტი, ვნახოთ ვისი ახსნა აჯობებს, ჭაბუკი პოლიტიკოსების, რომლებიც სადიპლომო ნაშრომის კონსტიტუციად ქცევას აპირებენ,თუ იმ პოლიტიკოსების, რომლებიც არიან ერთსულოვანი კონსტიტუციის პროექტთან დაკავშირებით?“, - აღნიშნავს მამუკა კაციტაძე.