ხმების მითვისების დაკანონება - პრეზიდენტი გადაუნაწილებელი მანდატების საკითხს გამოეხმაურა

პოლიტიკა - 15:31, 04 May, 2017

1198

სოხუმის უნივერსიტეტის სტუდენტებთან შეხვედრისას საქართველოს პრეზიდენტმა კონსტიტუციის ახალი პროექტით შემოთავაზებული საარჩევნო სისტემის შესახებ ისაუბრა. პრეზიდენტის მხრიდან კრიტიკის საგანი გახდა ის საკონსტიტუციო ცვლილებები, რომელიც ბლოკების შექმნის უფლების გაუქმებას, 5%-იანი ბარიერის შენარჩუნებას და გადაუნაწილებელი მანდატების მმართველი გუნდისთვის მინიჭებას გულისხმობს:

"5%-იანი ბარიერი მაღალია, პოლიტიკური პარტიებისთვის, რომლებიც არ არიან ძლიერები. ჩვენი უახლესი პოლიტიკური ტრადიციაა ბლოკები. ჩვენც ბლოკით ვუპირისპირდებოდით წინა ხელისუფლებას. თან ისე, რომ ამ პარტიებს ვეუბნებით - ეს ყველაფერი მათზე ზრუნვით ხდება. ადეკვატური უნდა იყო პოლიტიკური ვითარების მიმართ. თუ ჩვენ პლურალიზმის მომხრე ვართ, ისიც უნდა დაუშვა, რომ სხვა პარტიებიც მოვიდნენ ხელისუფლებაში, თუ არ მოვლენ, ითამაშონ მაინც პოლიტიკურ ველზე. ეს არის ძალიან არასწორი მეთოდი, რომელსაც ვხედავ პროექტში. საუბარია იმაზე, რომ ყველა მივდივართ არჩევნებზე და ეს არის უზენაესი. ამასობაში მე ხმა რომ მივეცი რომელიმე პარტიას, შესაძლოა, სხვა პარტიის კალათაში აღმოჩნდეს და ამას დაერქმევა ბონუსის სისტემა. ამ სიტყვის უკან დგას შეფასება - მითვისება. თუ ჩვენ წლების განმავლობაში ვეწინააღმდეგებოდით ხმების მითვისებას, ხვალ ეს პროცესი უნდა დაკანონდეს. ჩემი აზრით, ვინც ეს შემოგვთავაზა, ამ ხალხს უნდა ვუთხრათ, რომ სხვისი ხმების მითვისება არ არის საშური საქმე", - განაცხადა გიორგი მარგველაშვილმა.