საქართველოს პრემიერ–მინისტრმა მთავრობის სხდომაზე განაცხადა, რომ 2017 წლის ივლისის ბოლოდან, სამი თვის განმავლობაში, ახლად შექმნილ ბორდოს ღვინის მსოფლიო ცივილიზაციის ცენტრში საქართველო პირველი საპატიო სტუმარი და მევენახეობა-მეღვინეობისადმი მიძღვნილი მასშტაბური ღონისძიებების ორგანიზატორი და მასპინძელი იქნება:

„ბორდოს ღვინის მსოფლიო ცივილიზაციის ცენტრში წელს პირველად იმართება ღვინის ცივილიზაციის გამოფენა, სადაც საქართველო არის მასპინძელი, როგორც ღვინის ცივილიზაციის აკვანი და ღვინის ქვეყანა, სადაც ეს კულტურა შეიქმნა. ეს არის ძალიან მნიშვნელოვანი მოვლენა. ივლისის ბოლოდან, ოქტომბრის ჩათვლით, ბორდოსთან ერთად საქართველო უმასპინძლებს ამ მნიშვნელოვან გამოფენას, სადაც გაიმართება სხვადასხვა საინფორმაციო ხასიათის წარმოდგენა, იქნება მაქსიმალური ინფორმაცია ჩვენი ქვეყნის, ჩვენი უძველესი კულტურის, ქართული ღვინის, ხელოვნების შესახებ. ამ წარდგენას ხელმძღვანელობს სოფლის მეურნეობის მინისტრი. გამომდინარე გამოფენის განსაკუთრებული მნიშვნელობიდან, მინდა ვთხოვო ყველა უწყებას მაქსიმალურად ითანამშრომლოს ბატონ ლევან დავითაშვილთან, რათა საქართველო საუკეთესო კუთხით წარმოჩინდეს.

ამას ძალიან დიდი მნიშვნელობა აქვს ჩვენი ქვეყნის საერთაშორისო ცნობადობის ამაღლებისა და ჩვენი უძველესი კულტურის გაცნობის კუთხით. ეს არის დიდი მიღწევა, რომ ბორდოში ღვინის მსოფლიო ცივილიზაციის ცენტრში, პირველი საგამოფენო წლის განმავლობაში, საქართველო იქნება მასპინძელი. მინდა ყველას მოგილოცოთ ეს მიღწევა. ასეთი რამ ალბათ, წარმოუდგენელიც იყო წლების წინ და დღეს ეს გახდა შესაძლებელი, რაც მნიშვნელოვანი მიღწევაა“,- განაცხადა პრემიერ-მინისტრმა.