,,პარტიულ ინტერესებსა და ოლიგარქზე მორგებული კონსტიტუცია ხელისუფლებას კიდევ უფრო დააშორებს ხალხს“

,,პარტიულ ინტერესებსა და ოლიგარქზე მორგებული კონსტიტუცია ხელისუფლებას კიდევ უფრო დააშორებს ხალხს“ - ირაკლი ღლონტი

პოლიტიკა - 21:30, 02 May, 2017

1932

კონსტიტუციის დაცვისათვის ამ უკომპრომისო ბრძოლაში უნდა მოვიწვიოთ რაც შეიძლება მეტი ჩვენი თანამოქალაქე, - ეს განცხადება პარტია ,,რეფორმატორების’’ თავმჯდომარემ ირაკლი ღლონტმა პრეზიდენტთან შეხვედრის დასრულების შემდეგ გააკეთა.

,,მართალია პარლამენტის თავმჯდომარე პრეზიდენტს და კონსტიტუციის დაცვის ყველა მხარეს ნაკლებად სახარბიელო კონტექსტში მოგვიხსენიებს, თუმცა მინდა საზოგადოება ჩადგეს საქმის კურსში, რომ ჩვენი სამოქალაქო კამპანიის მიზანი არა დესტრუქცია, არამედ ჩვენი ხალხის საერთო ღირებულებათა კრებულის, ქვეყნის უზენაესი საკანონმდებლო აქტის დაცვაა.

აშკარაა, რომ პრეზიდენტი და ჩვენც ვიზიარებთ მოსაზრებას, რომ კონსტიტუცია ყველასია და არც ერთ ჩვენგანს არ გვაქვს უფლება ვივაჭროთ მასთან მიმართებით, უბრალოდ იმის გათვალისწინებით, რომ ის ცალკე აღებული არავის არ ეკუთვნის, მათ შორის არც ქვეყნის პრეზიდენტს.

ერთადერთი რაც დღეს პრეზიდენტს, შეხვედრაზე მყოფ კოლეგებს და სხვა მოქალაქეებს გავუზიარე არის ის, რომ ამ უკომპრომისო ბრძოლაში უნდა მოვიწვიოთ რაც შეიძლება მეტი თანამოქალაქე და კიდევ უფრო ხმამაღლა უნდა ვისაუბროთ ხალხთან ამ რედაქციიდან გამომდინარე საფრთხეებზე. უნდა ვისაუბროთ, რომ ვიწრო პარტიულ ინტერესებს მორგებული კონსტიტუცია, აბსულუტურად შეუზღუდავი ძალაუფლების და ყველა კონსტიტუციურ ორგანოზე ზეგავლენის განმხორციელებელი ოლიგარქი , ასევე მისი ხელისუფლება, კიდევ უფრო მეტად დაშორდება ხალხს, უფრო და უფრო ჩატყდება ხიდი ხელისუფლებას და მოსახლეობას შორის.

ჩვენ უნდა ვესაუბროთ ყველა თანამოქალაქეს, ვესუაბროთ დევნილ საზოგადოებას და ვუთხრათ, რომ ინსტიტუციური ნგრევის, ხელისუფლების უზურპაციისა და ძალაუფლების მიტაცების პირობებში გაგვიჭირდება ავაშენოთ ისეთი სახელმწიფო, რომელიც დაგვაახლოებს ტერიტორიული მთლიანობის აღდგენასთან, ქვეყნის გამთლიანებასთან’’- ნათქვამია განცხადებაში.