„ეროვნულ დემოკრატიული პარტიის“ ლიდერი ბაჩუკი ქარდავა აცხადებს, რომ დღევანდელმა შეხვედრამ „ქართულ ოცნებას“ პიარი გამოაცალა, რადგან მისი თქმით, კონსტიტუციაში შესატან ცვლილებებზე დისკუსია აბსოლუტურად ღია რეჟიმში წარიმართა.

ოპოზიციის ერთ-ერთი ლიდერის განცხადებით, შეხვედრაზე პოლიტიკურმა პარტიებმა, არასამთავრობო ორგანიზაციებმა და თავად პრეზიდენტმა კონსტიტუციის ირგვლივ სტრატეგია და ხედვა გაცვალეს:

„დღევანდელმა დღემ „ქართულ ოცნებას“ საბოლოოდ გამოაცალა ხელიდან ის პიარი, რითაც საიდუმლო შეთქმულებებზე აპელირებდა საქართველოს პრეზიდენტთან მიმართებით. დღეს იყო საჯარო, ღია შეხვედრა პრეზიდენტის რეზიდენციაში - ინსტიტუტთან, რომელიც პასუხისმგებელია კონსტიტუციის დაცვაზე, სრული, კონსოლიდირებული პოლიტიკური სპექტრისა და არასამთავრობო ორგანიზაციებით.

ჩვენ მას გავაგებინეთ ჩვენი პოზიცია, ტაქტიკა კონსტიტუციის ცვლილებასთან დაკავშირებით, პრეზიდენტმა გვითხრა თავისი შეხედულებები თუ როგორ იმოქმედებს ის კონსტიტუციის დასაცავად. ბუნებრივია, პოლიტიკური პარტიებისა და პრეზიდენტის ტაქტიკა ყველა შემთხვევაში ერთნაირი ვერ იქნება, მაგრამ ძალიან ბევრ საკითხში შეიძლება მოხდეს გადაკვეთა“, - განაცხადა ბაჩუკი ქარდავამ.

მისი თქმით საქართველოში დემოკრატიისთვის ბრძოლა იწყება:

„ის, რომ ეს უკანასკნელი შეხვედრა არ იქნება, ამაში მინდა დაგარწმუნოთ და იმის გარანტიას იძლევა, რომ საქართველოში უკვე იწყება ფართომასშტაბიანი ბრძოლა ქართული დემოკრატიისა და სამართლებრივი კანონმდებლობის, კონსტიტუციის დასაცავად“, - დასძენს ბაჩუკი ქარდავა.