პლებისციტი არის ყველაზე კარგი საშუალება ხელისუფლების არგუმენტების გასაქარწყლებლად- გოგორიშვილი

პოლიტიკა - 17:15, 02 May, 2017

1349

საკონსტიტუციო ცვლილებებთან დაკავშირებით პრეზიდენტთან გამართულ შეხვედრას საპარლამენტო ოპოზიციაც ესწრება. ევროპული საქართველოს წევრის ხათუნა გოგორიშვილის განცხადებით, იმის სადემონსტრაციოდ რომ მმართველი გუნდის შემოთავაზებულ ცვლილებებს, არა მარტო პოლიტიკური ძალები და არასამთავრობო სექტორი, არამედ საზოგადოებაც არ ეთანხმება, პლებისციტი საუკეთესო საშუალებაა:

„რაც არ უნდა მოვისმინოთ ხელისუფლებისგან ფაქტი ერთია, ერთ მხარეს არის „ქართული ოცნება“ რომელმაც არჩევნებზე 28 % მიიღო მეორე მხარეს კი ყველა სხვა პოლიტიკური ძალა, რომელთა მთლიანი მხარდაჭერა გაცილებით მეტია, ამას ემატება არასამთავრობო ორგანიზაციები და ექსპერტები. აქ მთავარია ერთი რამ, უნდა მოხდეს იმ არგუმენტის გაქარწყლება, რომელიც აქვს ქართულ ოცნებას, რომ ხალხის ნება არაა და მხოლოდ პარტიების და არასამთავრობო ორგანიზაციების ნებაა. ამის მაქსიმალური დემონსტრირება უნდა მოხდეს პლებისციტით . ჩვენ ევროპული საქართველოს წევრები ვთვლით, რომ ეს არის ყველაზე კარგი საშუალება ამ არგუმენტის გასაქარწყლებლად, ეს არის ხალხის ნების გამოვლინება, ჩვენ ჩვენი კოლეგების ყველა კანონიერ ქმედებას შევუერთდებით, როგორც ქვეყნის შიგნით ისე გარეთ. ამ ნაბიჯებით, მოხდება დემონსტრირება, რომ ხალხი ქართულ ოცნებას არ ეთანხმება“- განაცხადა ხათუნა გოგორიშვილმა.

შეგახსენებთ, ოპოზიციური პარტიები, არასამთავრობო სექტორი და ექსპერტთა წრის წარმომადგენლები დღეს პრეზიდენტთან შეხვედრას მართავენ, გიორგი მარგველაშვილთან შეხვედრის მთავარი საკითხი საკონსტიტუციო რეფორმაა.