,,ხელისუფლება პოლიტიკურ კლასს რევოლუციის გზას უტოვებს“ - ინაშვილი რეფერენდუმს ითხოვს და აქციებს აანონსებს

პოლიტიკა - 16:20, 02 May, 2017

1789

პატრიოტთა ალიანსი საკონსტიტუციო ცვლილებებთან დაკავშირებით რეფერენდუმის ჩატარების ინიციატივით გამოდის. ირმა ინაშვილის თქმით აღნიშნული მოთხოვნით მისი პარტია ცენტრალურ საარჩევნო კომისიას უახლოეს მომავალში მიმართავს, უარის თქმის შემთხვევაში კი „პატრიოტთა ალიანსი“ საპროტესტო აქციებს აანონსებს. პარლამენტის ვიცე-სპიკერის განცხადებით, პროპორციული სისტემის მოდელი, რაც კონსტიტუციური პროექტითაა შეთავაზებული, ქვეყანაში პოლიტიკურ კლასს მარხავს და ქვეყნის სტაბილურობას საფრთხეს უქმნის.

„პირველ რიგში, ეს საარჩევნო სისტემას უკავშირდება. ჩვენთვის მიუღებელია ხმების გადანაწილების ის პრინციპი, რაც ასახულია პროექტში. ეს ძალიან ავტორიტარული მიდგომაა, ქვეყანაში პოლიტიკურ კლასს მარხავს და ქვეყნის სტაბილურობას საფრთხეს უქმნის. პოლიტიკურ კლასს ერთადერთ გზას - რევოლუციის გზას უტოვებს, რომლის მომხრე არ ვართ. ამიტომ ვეცდებით, ხელისუფლება დავარწმუნოთ იმაში, რომ აუცილებელია, ე.წ. ბონუსების ის ცვლილება შეიცვალოს, რაც პროექტშია წარმოდგენილი. ხელისუფლებას მივმართავ, ჩვენ არ გვინდა მტრობა და ისე ნუ გავაკეთებთ, რომ უკან დასახევი გზა აღარ დაგვრჩეს. ჩვენ ცენტრალურ საარჩევნო კომისიას მივმართავთ რეფერენდუმის ჩატარების მოთხოვნით თუ ცესკო ჩვენ არ მოგვცემს ხელმოწერების შეგროვების საშუალებას. მაისის ბოლოს ჩვენ გავმართავთ გამაფრთხილებელ საპროტესტო აქციას, აქციის დასრულებისთანავე დავიწყებთ მჯდომარე აქციას, ივნისის პირველ რიცხვებში მჯდომარე აქცია გადაიზრდება შიმშილობის აქციაში.“- განაცხადა ირმა ინაშვილმა.