უსაფრთხოების სექტორის საორიენტაცი კურსი დაიწყო

პოლიტიკა - 15:38, 01 May, 2017

1175

თავდაცვის ინსტიტუციური აღმშენებლობის (DIB) სკოლაში უსაფრთხოების სექტორის საორიენტაციო კურსი დაიწყო. ეს არის პირველი გრძელვადიანი სასწავლო პროგრამა, რომელსაც DIB-ის ხელმძღვანელობა უსაფრთხოების სექტორის აუდიტორიას სთავაზობს.

კურსი სალექციო კვირეულს, ტრენინგ-მოდულებსა და პრაქტიკულ სამუშაოებს მოიცავს. პროგრამაში დისტანციური სწავლების მოდულია ინტეგრირებული, იგეგმება გასვლითი ტურებიც სხვადასხვა უწყებაში.

საორიენტაციო კურსი დღეს, სალექციო კვირეულით გაიხსნა. პოლიტიკის მეცნიერებათა აკადემიის დოქტორმა, თბილისის სახელმწიფო უნივერსიტეტის ლექტორმა, კორნელი კაკაჩიამ საქართველოს სახელმწიფო უწყებებში დასაქმებულ უსაფრთხოების სექტორის წარმომადგენლებს თემაზე „საერთაშორისო უსაფრთხოების თანამედროვე გამოწვევები“ ლექცია წაუკითხა. მან ყურადღება მსოფლიოში არსებულ გამოწვევებზე, რეგიონულ და გლობალურ საფრთხეებზე, საერთაშორისო ტერორიზმსა და ამ კონტექსტში სახელმწიფოს უსაფრთხოების მნიშვნელობაზე გაამახვილა.

ლექციაზე საუბარი შეეხო კიბერუსაფრთხოებასთან დაკავშირებულ სააფრთხეებს, კიბერდანაშაულებსა და ჰიბრიდულ ომს, რაც თანამედროვე მსოფლიოს ერთ-ერთ მნიშვნელოვან გამოწვევას წარმოადგენს. კორნელი კაკაჩიამ რეგიონში მიმდინარე პროცესებზე დაკვირვებისა და საქართველოს მხრიდან საერთაშორისო პარტნიორებთან თანამშრომლობის გაღრმავების მნიშვნელობაზეც ისაუბრა. მოგვიანებით, ლექცია კითხვა-პასუხის რეჟიმში გაგრძელდა.

უსაფრთხოების სექტორის საორიენტაციო კურსი ორი თვე გაგრძელდება და ათი მოდულით იქნება წარმოდგენილი.