ეუთო-ს ექსპერტები მედიის თავისუფლების საკითხებში, რომლებიც თბილისში იმყოფებიან, დღეიდან ოფიციალურ შეხვედრებს იწყებენ. ოპოზიცია ექსპერტებთან შეხვედრის ფარგლებში რუსთავი 2-თან დაკავშირებით არსებულ ვითარებასა და ქვეყანაში რუსული პროპაგანდის საფრთხეზე გაამახვილებს ყურადღებას:

„დეტალურად ვაპირებთ, რომ განვიხილოთ რუსთავი 2-თან დაკავშირებით შექმნილი ვითარება და ავუხსნათ მათ თუ რა საფრთხეს წარმოადგენს ჩვენი ქვეყნისთვის და ამ ქვეყანაში დემოკრატიისთვის რუსთავი 2-ზე ზეწოლის გაგრძელება. ასევე, მე პირადად ვაპირებ, ვისაუბრო პრობლემებზე, რასაც დღეს უქმნის ჩვენს ქვეყანას რუსული პროპაგანდა ქვეყანაში,“ - ამბობს სალომე სამადაშვილი.

აღნიშნულ საკითხებზე საუბარს გეგმავს „ევროპული საქართველოც“:

„აქ ბოლო პერიოდის განმავლობაში ყველაზე მნიშვნელოვანი თემა, იყო რუსთავი 2-ის საკითხი, შესაბამისად, ეს ინფორმაცია იქნება მიწოდებული და ყველაზე მნიშვნელოვანია მათი შეფასებები,“ - აცხადებს გიგი წერეთელი.

უთოს ექსპერტებთან შეხვედრაზე საპარლამენტო უმრავლესობა აქცენტის გაკეთებას მედია ომბუდსმენთან დაკავშირებულ საკითხებზე გეგმავს.

„იქნება ეს კონკრეტულად ომბუდსმენის ინსტიტუტი თუ იქნება სხვა ფორმატი, მაგალითად ხანგრძლივი ექსპერტული ჩართულობა, ეს არის დამოკიდებული იმ რეკომენდაციებზე, რომელსაც ჩვენ მივიღებთ ამ ორდღიანი შეხვედრების შემდგომ,“ - განაცხადა თამარ ჩუგოშვილმა.