მოსამართლის მიმართ გამოთქმულ კრიტიკასა და შეურაცხყოფას შორის ზღვარის დაწესება - იუსტიციის უმაღლესი საბჭოს ინიციატივას პოლიტიკოსები აფასებენ. მმართველ გუნდში აღნიშნავენ, რომ ინიციატივას სურვილის შემთხვევაში განიხილავენ, მათი განცხადებით მიუხედავად განხილვებისა, გარკვეული ტიპის რეგულაციების მიღება სიტყვის თავისუფლეის შეზღუდვის ხარჯზე არ მოხდება:

„ნებისმიერი ცვლილება, რომელიც შეიძლება ოდნავ მაინც რისკის ქვეშ აყენებდეს სიტყვის და გამოხატვის თავისუფლებას, ჩვენს მიერ არ იქნება გაზიარებული. მაგრამ, ჩვენ ყურადღებით ვნახავთ იმ პაკეტს ან ნორმაში ცვლილებას, რომელიც შეიძლება შემოგვთავაზონ ამ საკითხთან დაკავშირებით,“ - განაცხადა ქართული ოცნების წევრმა მამუკა მდინარაძემ.

იუსტიციის უმაღლესი საბჭოს წინადადება კრიტიკის საგანია ოპოზიციის რიგებში. „ნაციონალურ მოძრაობაში“ მიიჩნევენ, რომ აღნიშნული ინიციატივა ოლიგარქული რეჟიმის კიდევ უფრო გაძლიერებას ისახავს მიზანდ:

„ამ ინიციატივით ქართული ოცნება ცდილობს, რომ ძალისმიერი მეთოდებით ქართულ საზოგადოებას ამოუკეროს პირი, რაც მიზნად ისახავს ოლიგარქიული რეჟიმის კიდევ უფრო გაძლიერებას. ეს არის სიტყვის თავისუფლების წინააღმდეგ გადადგმული ნაბიჯი და ეს არის თანასწორთა შორის კიდევ უფრო თანასწორთა კლასის შექმნის ინიციატივა,“ - აცხადებს ენმ-ის წევრი კოტე იოსელიანი.

„ევროპული საქართველოც“ წინააღმდეგია შემოღებული იყოს მსგავსი ტიპის რეგულაციები. გიგი წერეთელი მიიჩნევს, რომ აღნიშნული ზღუდავს გამოხატვის თავისუფლებას:

„ჩვენ ძალიან არ გვსიამოვნებს ბევრი რამ, მაგრამ ეს საკითხი არ დაგვიყენებია. მე პოლიტიკოსები მყავს მხედველობაში და თუნდაც დეპუტატები. კანონმდებლობით ზოგიერთი სხვა ამ ტიპის გადაცდომა რეგულირდება და მე ნამდვილად არ ვიცი მოსამართლეებზე ცალკე ეს მოხერხდეს,“ - ამბობს ევროპული საქართველოს წევრი გიგი წერეთელი.